छत्रपती संभाजीनगर (मेट्रोपोलिस पोस्ट वृत्तसेवा) : सुसाट क्रेटा कारचालकाने दिलेल्या धडकेत ॲक्टिवा स्कुटीवर व्यक्तीचा जागीच मृत्यू झाला. हा भीषण अपघात सोमवारी (२२ डिसेंबर) रात्री ९ ला बाबा पेट्रोलपंप ते मध्यवर्ती बसस्थानक रोडवरील पुष्पनगरीतील पारगावकर हॉस्पिटलजवळ घडला.
पॉल प्रेमनंद पाटोळे (वय ६०, रा. साठे चौक भीमनगर, भावसिंगपुरा) असे मृतकाचे नाव आहे. कारचालकाचे नाव सुनिल श्रीराम वाठोरे (वय ४६, रा. भगत किराणाजवळ वसुंधरा कॉलनी, नंदनवन कॉलनी छावणी) असे आहे. त्याच्याविरुद्ध पोलीस अंमलदार साहेबराव चव्हाण यांच्या तक्रारीवरून गुन्हा दाखल करण्यात आला आहे. अपघातानंतर जमलेल्या लोकांनी त्याला पकडून ठेवले होते.
अपघाताची माहिती नागरिकांनी पोलिसांना दिल्यानंतर क्रांती चौक पोलिसांनी लगेचच घटनास्थळी धाव घेतली. अपघातामुळे मोठ्या प्रमाणावर वाहतुकीची कोंडी झाली होती. वाहतूक सुरळीत करतानाच पाटोळे यांना पोलिसांनी घाटी रुग्णालयात दाखल केले. तिथे डॉक्टरांनी तपासून त्यांना मृत घोषित केले. वाठोरेला ताब्यात घेतले. कारने स्कुटीला मागून उडवल्याचे नागरिकांनी पोलिसांना सांगितले. अधिक तपास सहायक पोलीस उपनिरीक्षक रमेश कांदे करत आहेत.
वैजापूरमध्ये भीषण अपघातात कारचा अपघात, एकाचा मृत्यू, तिघे जखमीभरधाव कारची ट्रॅक्टरला मागून धडक बसली. यात कारमधील एकाचा मृत्यू तर तिघे जखमी झाले. हा अपघात वैजापूर- खंडाळा रस्त्यावरील रोटेगाव उड्डाणपुलाजवळ रविवारी (२१ डिसेंबर) रात्री ११ च्या सुमारास घडला. ऋषिकेश राजू सोळसे (वय २५, रा. लोणी बुद्रूक, ता. वैजापूर) असे मृत्यू झालेल्याचे नाव आहे. आदित्य थोरात (वय २२), सिद्धार्थ राजू सोळसे (वय २१) व कृष्णा संतोष कटारे (वय २०, तिघेही रा. लोणी बुद्रूक) जखमी झाले आहेत.
वैजापूर येथून लोणी बुद्रूक येथे ऋषिकेश सोळसे कारने (एम. एच. ०२, सी. आर. ६५४०) आदित्य थोरात, सिद्धार्थ राजू सोळसे, कृष्णा संतोष कटारे यांच्यासह जात होते. त्यावेळी रोटेगाव उड्डाणपुलाजवळ कन्नडकडे ऊस घेऊन जाणाऱ्या ट्रॅक्टरच्या ट्रॉलीवर कार मागून धडकली. कारमधील ऋषिकेश सोळसे यांचा जागीच मृत्यू झाला. जखमींवर वैजापूर येथील खासगी रुग्णालयात उपचार सुरू आहेत. ऋषिकेशच्या पार्थिवाची उत्तरीय तपासणी करून मृतदेह नातेवाइकांच्या ताब्यात देण्यात आला. या अपघाताची नोंद वैजापूर पोलिसांनी केली आहे.
