छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : येणाऱ्या जाणाऱ्यांना पिस्तुलाचा धाक दाखवून मैने इससे पहले भी एक को टपकाया है और अभी दो-तीन जनोंको टपकाना है, असे धमकावणाऱ्या अट्टल गुन्हेगाराच्या मुसक्या आवळण्यात शहर गुन्हे शाखेला शुक्रवारी (२४ ऑगस्ट) रात्री साडेदहाच्या सुमारास यश आले. ही कारवाई भडकल गेटजवळील महाराष्ट्र शैक्षणिक नियोजन व प्रशासन संस्थेच्या बाजूला पडक्या इमारतीजवळ करण्यात आली.
शेख अशफाक शेख ईसाक (वय ३२, रा. लोकसेवा दूध डेअरीजवळ, शहा बाजार, छत्रपती संभाजीनगर) असे या अट्टल गुन्हेगाराचे नाव आहे. त्याच्याकडून पोलिसांनी १ लाख रुपयांच्या २ पिस्तुल, १८ हजारांची सहा काडतुसे जप्त केली. शहर गुन्हे शाखेचे पथक अवैध धंद्यांवर कारवाई आणि फरारी संशयितांचा शोध घेण्यासाठी गस्त घालत होते. भडकल गेट येथे आले असता गुप्त बातमीदाराने माहिती दिली, की महाराष्ट्र शैक्षणिक नियोजन व प्रशासन संस्थेच्या बाजूला पडक्या इमारतीजवळ शेख अशफाक हा पिस्तुलाचा धाक दाखवून रस्त्याने येणाऱ्या जाणाऱ्यांना धमकावत आहे. पोलिसांनी लगेचच त्याच्याकडे धाव घेतली. दुरून त्याला हेरून त्याच्या नकळत अचानक पोलिसांनी त्याच्यावर झडप घातली.
पोलीस उपनिरीक्षक प्रविण वाघ यांनी त्याची अंगझडती घेतली असता त्याच्याकडे कमरेला दोन पिस्तुल प्रत्येकी ३ जीवंत काडतुसांसह मिळून आले. शेख अशफाकविरुद्ध सिटी चौक पोलीस ठाण्यात गुन्हा दाखल करण्यात आला आहे. तो अट्टल गुन्हेगार असून, त्याच्याविरुद्ध यापूर्वी सिटीचौक, जिन्सी, बेगमपुरा पोलीस ठाण्यांत गंभीर स्वरुपाचे गुन्हे दाखल आहेत. ही कारवाई पोलीस आयुक्त प्रविण पवार, पोलीस उपायुक्त रत्नाकर नवले, सहायक पोलीस आयुक्त संपत शिंदे यांच्या मार्गदर्शनाखाली पोलीस निरीक्षक गजानन कल्याणकर, पोलीस उपनिरीक्षक प्रविण वाघ, पोलीस अंमलदार संदीप तायडे, योगश गुप्ता, विक्रम खंडागळे, राजेश यदमळ, मनोज विखणकर, सोमकांत भालेराव, विजय निकम, अमोल मुगळे, चालक पोलीस अंमलदार सोमनाथ दुकले यांनी केली.
.jpeg)
