अनाहूत पाहुणा साखरपुड्याला आला, वाचा गडबड काय केली... सुतगिरणी चौकातील मंगल कार्यालयात घडला हा धक्कादायक प्रकार

छत्रपती संभाजीनगर (मेट्रोपोलिस पोस्ट वृत्तसेवा) : पाहुण्यानं कमालच केली,  सुटबुटात आला अन्‌ स्टेजवरून महिलेची पर्स गायब केली. पर्समध्ये २ महागडे मोबाइल आणि २ हजार रुपये होते. ही घटना रविवारी (७ डिसेंबर) दुपारी १ ला सुतगिरणी चौकातील जानकी मंगल कार्यालयात घडली.

जळगाव जिल्ह्यातील अमळनेरचा हर्ष रवींद्र भावसार (वय २५) मावस भावाच्या साखरपुड्यासाठी आईसह आला होता. त्याच्या आईने पूजेचे साहित्य घेऊन स्टेजवर जाण्याआधी पर्स स्टेजच्या बाजूला ठेवली. चोरट्याने ही संधी साधून कुणाचे लक्ष जाणार नाही, अशा रितीने हळूच ही पर्स लांबवली. चोरटा सीसीटीव्ही कॅमेऱ्यात कैद झाला आहे. तो अत्यंत टापटीप वेशात होता.

हातात जॅकेट गुंडाळले होते. एखाद्या जवळच्या नातेवाइकासारखा समारंभात वावरत होता. स्टेजजवळ महिला गप्पा मारत असताना त्यांच्यामागे १० मिनिटे थांबला. नंतर पर्स उचलली अन्‌ पोबारा केला. हर्षची आई पर्स घेण्यासाठी परतली तर पर्सच गायब. त्यानंतर समारंभात एकच गोंधळ उडाला. जवाहरनगर पोलिसांनी गुन्हा दाखल करून चोरट्यांचा शोध सुरू केला आहे.

दुचाकीवरून आलेल्या मंगळसूत्र चोरांचा पुन्हा कहर...टिळकनगरात पुन्हा कारनामा...
टिळकनगरमध्ये ६० वर्षीय महिलेचा पाठलाग करून दुचाकीवर आलेल्या लुटारूंनी दोन सोनसाखळ्या (एकूण ४ तोळे) हिसकावून पळ काढला. ही घटना सोमवारी (८ डिसेंबर) रात्री ९ वाजता ही घटना घडली. टिळकनगरमध्ये राहणारी वृद्धा मुलासोबत जवळच असलेल्या खासगी नेत्र रुग्णालयात तपासणीसाठी गेल्या होत्या. आईची तपासणी झाल्यानंतर मुलाच्या सांगण्यावरून त्या एकट्याच घराकडे पायी निघाल्या. रस्ता ओलांडून बालाजी मंदिराच्या दिशेने जात असताना घराच्या कोपऱ्यावरच मागून आलेल्या चोरांनी त्यांना लुटले.

एक साखळी १ तोळ्याची, तर दुसरी तीन तोळ्याची होती. जवाहरनगर पोलीस ठाण्याचे पोलीस निरीक्षक सचिन कुंभार, पोलीस उपनिरीक्षक मारोती खिल्लारे यांनी घटनास्थळी धाव घेऊन माहिती घेतली. वृद्धेच्या पतीचे २ डिसेंबरला निधन झाले. त्यांचा पुण्यात राहणारा मुलगा घरी आलेला आहे. काही दिवसांपासून डोळ्यांचा त्रास होत असल्याने मुलाने त्यांना रुग्णालयात नेले होते. त्याच वेळी घरी नातेवाईक आल्याने तपासणी होताच मुलाने आईला घरी जाण्यास सांगितले होते. चोरांनी जॅकेट परिधान करून तोंडही बांधलेले होते.