ब्रेकअपनंतर प्रियकराचा जाच, घरासमोर येऊन घातला गोंधळ! तरुणीची पोलिसांत धाव, चिकलठाणा पोलीस ठाण्याच्या हद्दीत काय घडलं?

छत्रपती संभाजीनगर (मेट्रोपोलिस पोस्ट वृत्तसेवा) : ब्रेकअपनंतरही प्रियकराच्या डोक्यातून प्रेम न गेल्याने त्याने तरुणीचा पाठलाग सुरू केला. बोलण्याचा हट्ट करू लागला. तुझे कोणासोबतही लग्न होऊ देणार नाही, अशा धमक्या देऊ लागला. तिच्या घरासमोर येऊन गोंधळ घातला. अखेर वैतागलेल्या तरुणीने चिकलठाणा पोलीस ठाण्यात धाव घेतली. पोलिसांनी घटना गांभीर्याने घेत गुन्हा दाखल करून माथेफिरू प्रियकराला अटक केली आहे.

हेमंत संजय काकड (वय २२, रा. सातारा परिसर) असे प्रियकराचे नाव असून, त्याला मदत केल्याने त्याचा मित्र प्रकाश रतन जोगदंड (रा. सातारा परिसर) हाही गोत्यात आला आहे. त्याच्याविरुद्धही पोलिसांनी गुन्हा दाखल केला आहे. २१ वर्षीय तरुणीने या प्रकरणात तक्रार दिली आहे. तक्रारीनुसार, ती कुटुंबासह चिकलठाणा पोलीस ठाण्याच्या हद्दीत राहते. नामांकीत कोचिंग क्लासेसमध्ये नीटची तयारी करत असताना तिची ओळख काही महिन्यांपूर्वी हेमंतसोबत झाली. दोघे वारंवार संपर्कात येऊ लागले.

भेटीगाठी सुरू झाल्या. तो तिला नियंत्रणात ठेवण्याचा प्रयत्न करत असल्याने तरुणीला त्याचे वागणे खटकू लागले. तिने त्याच्यापासून अंतर ठेवायला सुरुवात केली. अखेर त्याच्यासोबत फेब्रुवारी २०२५ मध्ये ब्रेकअप केले. मात्र तोपर्यंत प्रेम हेमंतच्या डोक्यात गेले होते. तो तिचा पाठलाग करू लागला. बोलण्याचा हट्ट करू लागला. तुझे कोणासोबतही लग्न होऊ देणार नाही. लग्न केल्यास तुझ्या पतीलाही मारून टाकेन, अशा धमक्या देऊ लागला, असे तरुणीने तक्रारीत म्हटले आहे. यामुळे तरुणी तणावाखाली गेली. 

२९ नोव्हेंबरला हेमंतने मित्र प्रकाश जोगदंडसोबत तिच्या भावाचा पाठलाग करत मध्यरात्री १२ वाजता थेट तिचे घर गाठले आणि घरासमोर धिंगाणा घातला. दोघांचे फोटो व्हायरल करण्याचीही धमकी दिली. चिकलठाणा पोलिसांना कळताच त्यांनी तिथे येऊन हेमंतला ताब्यात घेतले. त्याच्यासह त्याच्या मित्राविरुद्ध गुन्हा दाखल करून अटक केली. हेमंतची रवानगी न्यायालयाने हर्सूल कारागृहात केली आहे. हेमंतची बुलेट आणि मोबाइल पोलिसांनी जप्त केला आहे. हेमंतविरुद्ध यापूर्वी सातारा पोलीस ठाण्यात एक मारहाणीचा गुन्हा दाखल आहे. पोलीस उपनिरीक्षक श्रीनिवास धुळे अधिक तपास करत आहेत. सुरुवातीला मुलीचे कुटुंब तक्रार देण्यासासाठी घाबरत होते. पोलिसांनी त्यांना धीर दिला. हेमंतच्या वागण्यामुळे मुलीच्या अभ्यासावरही परिणाम झाल्याचे त्यांनी सांगितले.