मंगळसूत्र चोरांचे वाळूज MIDC पोलिसांना आव्हान!; आणखी एका महिलेचे मंगळसूत्र हिसकावले!!, महिला धास्तावल्या…

छत्रपती संभाजीनगर (सीएससीएन वृत्तसेवा) : वाळूज एमआयडीसी परिसरातील महिला एकट्यादुकट्या जायला आता घाबरू लागल्या आहेत. कारण दुचाकीवरून आलेल्या चोरट्यांनी महिलांना लक्ष्य केले असून, मंगळसूत्र हिसकावून ते पळ काढत आहेत. चोरी करताना अत्‍यंत निर्दयीपणे ते मंगळसूत्र हिसकावतात. धक्का देऊन पाडतात. मंगळवारी बजाजनगरातील चिंचबन कॉलनीत शतपावली करणाऱ्या ५० वर्षीय महिलेचे मंगळसूत्र हिसकावल्यानंतर बुधवारीही (३ जुलै) सायंकाळी सातच्या सुमारास दुचाकीवरून ट्रिपलसीट आलेल्या चोरट्यांनी शिक्षिकेचे २४ ग्रॅम वजनाचे मंगळसूत्र हिसकावून पळ काढला.

निर्मला हरिभाऊ काळवणे (वय ५२, रा. साऊथसिटी) यांनी या प्रकरणात तक्रार दिली आहे. त्‍या लासूर स्टेशनच्या जिल्हा परिषद शाळेत सहशिक्षिका आहेत. त्‍या साऊथसिटीतील गोलवाडी टेकडी ते रामकृष्ण मिशन ध्यान साधना केंद्र रस्त्यावरून पायी एकट्याच जात होत्या. मागून दुचाकीवर ट्रिपलसीट आलेल्या तिघांनी काळवणे यांच्याजवळ येऊन दुचाकीचा वेग कमी केला. मागे हेल्मेट घालून बसलेल्या चोरट्याने काळवणे यांच्या गळ्यातील सोन्याचे मंगळसूत्र हिसकावले…

चोर तो चोर, वर शिरजोर…
मंगळसूत्र हिसकावल्यानंतर चोरट्यांनी थोडे अंतर जाऊन दुचाकी थांबवली. मंगळसूत्र हिसकावणाऱ्या चोरट्याने हेल्मेट व तोंडाला बांधलेला रुमाल काढून काळवणे यांच्याकडे पाहिले आणि नंतर सुसाट पसार झाले. या प्रकारामुळे घाबरलेल्या काळवणे यांना ओरडण्याचेही सूचले नाही. नंतर त्‍यांनी चोर… चोर… म्हणून आरडा-ओरड केली. तोपर्यंत पसार झाले होते. त्‍यांनी घरी येऊन कुटुंबीयांना घडलेला प्रकार सांगितला. त्‍यानंतर वाळूज एमआडीसी पोलिसांत तक्रार देण्यात आली. पोलिसांनी चोरट्यांविरुद्ध गुन्हा दाखल करून शोध सुरू केला आहे. तपास पोलीस अंमलदार श्री. वैष्णव करत आहेत.