छत्रपती संभाजीनगर (सीएससीएन वृत्तसेवा) : मुलीला पळवून नेत प्रेमविवाह केल्याने मुलीच्या संतापलेल्या पित्याने जावयाच्या पोटात चाकू खुपसून जीवे मारण्याचा प्रयत्न केला. ही घटना रविवारी (१४ जुलै) रात्री घडली. मुलाची प्रकृती गंभीर असून, त्याच्यावर घाटी रुग्णालयात उपचार सुरू आहेत.
मुलाचे वडील मुरलीधर बबनराव साळुंखे (वय ४६, रा. इंदिरानगर) यांच्या तक्रारीवरून जवाहरनगर पोलीस ठाण्यात मुलीचे वडील गीताराम भास्करराव कीर्तीशाही व नातेवाइक आप्पासाहेब अशोकराव कीर्तीशाही (रा. इंदिरानगर) यांच्याविरुद्ध गुन्हा दाखल करण्यात आला आहे. मुरलीधर साळुंखे हे पत्नी छाया, मोठा मुलगा अमित, लहान मुलगा सुमित आणि सून विद्या यांच्यासह इंदिरानगरात राहतात.
२ मे २०२४ रोजी मुरलीधर यांचा मोठा मुलगा अमित (वय २५) याने शेजारी राहणारी मुलगी विद्या गीताराम कीर्तीशाही तिच्याशी प्रेमविवाह केला. त्यानंतर अमित आणि विद्या इंदिरानगरमध्येच राहायला आले. गीताराम कीर्तीशाही आणि आप्पासाहेब कीर्तीशाही हे दोघे येता जाता अमित याच्याकडे खुनशी वृत्तीने पाहत होते. रविवारी रात्री १०.१५ मिनिटांनी कुटुंबियांसोबत जेवण करून अमित फिरण्यासाठी घराबाहेर पडला असता पावणेअकराला मुरलीधर यांना अमितचा ओरडण्याचा आवाज आला.
अमित पिंपळाच्या झाडामागे रक्ताच्या थारोळ्यात कोसळलेला होता. तेथूनच त्याचे सासरे गीताराम व आप्पासाहेब हे त्यांना पळताना दिसले. मुरलीधर आणि सुमित यांनी अमितला उचलून घाटी रुग्णालयात दाखल केले. अमितने वडील मुरलीधर आणि भाऊ सुमित यांना माझ्यावर गीताराम कीर्तीशाही आणि आप्पासाहेब कीर्तीशाही यांनी चाकू हल्ला केल्याचे सांगितले. अमितच्या पोट व डाव्या मांडीत चाकूचे वार खोलवर गेले आहेत. त्याची प्रकृती चिंताजनक आहे.
