विवाहितेचा विहिरीत बुडून मृत्यू, सासरच्यांवर हत्येचा आरोप करत माहेरच्यांचे पोलीस ठाण्यासमोर आंदोलन, साडेचार तास अंत्यविधी थांबले!, फुलंब्रीतील घटना

फुलंब्री (मेट्रोपोलिस पोस्ट वृत्तसेवा) : वाणेगाव (ता. फुलंब्री) येथे ३१ वर्षीय विवाहितेचा विहिरीत बुडून मृत्यू झाला. विवाहितेच्या माहेरच्यांनी सासरच्यांवर हत्येचा आरोप करत फुलंब्री पोलीस ठाण्यासमोर मृतदेह आणला आणि सासरच्या लोकांविरुद्ध गुन्हा करून अटक करण्याची मागणी केली. साडेचार तास यामुळे तणाव निर्माण झाला. पोलिसांनी गुन्हा दाखल करून सासरच्यांना अटक केल्याचे व्हिडीओ कॉलद्वारे दाखवले. त्यानंतर विवाहितेचे नातेवाइक शांत झाले. ही घटना बुधवारी (१४ जानेवारी) घडली.

सुनिता अण्णा भोकरे (वय ३१, रा. वाणेगाव) असे मृत्यू झालेल्या विवाहितेचे नाव आहे. मोढा खुर्द (ता. सिल्लोड) येथील शिवाजी गवळी यांची मुलगी सुनीताचा विवाह १२ वर्षांपूर्वी वाणेगाव येथील अण्णा भोकरे याच्याशी झाला होता. त्यांना एक मुलगा, एक मुलगी अशी दोन अपत्ये आहेत. मंगळवारी सकाळी सुनिताचे सासू- सासरे, जाऊ विरमगाव येथे नातेवाइकाच्या अंत्यविधीसाठी गेले असताना दुपारी २ ते ३ च्या सुमारास सुनीता घराबाहेर पडल्या होत्या. सायंकाळपर्यंत घरी न आल्याने कुटुंबीयांनी शोध सुरू केला. मात्र शोध लागला नाही.

दुसऱ्या दिवशी बुधवारी सकाळी गावाजवळील विहिरीत सुनिताचा मृतदेह आढळला. फुलंब्री पोलिसांनी घटनास्थळी धाव घेऊन मृतदेह उत्तरीय तपासणीसाठी फुलंब्री ग्रामीण रुग्णालयात आणला. सुनिताच्या आत्‍महत्‍येची माहिती तिच्या माहेरी कळविण्यात आला. त्यानंत मोठ्या संख्येने नातेवाइक फुलंब्री पोलीस ठाण्यासमोर आले. त्यांनी सासरच्यांनीच हत्या केल्याचा आरोप केला. ‘इन-कॅमेरा' शवविच्छेदनाची मागणी केल्याने मृतदेह छत्रपती संभाजीनगर येथील घाटी रुग्णालयात नेण्यात आला. तेथे शवविच्छेदनानंतर मृतदेह नातेवाइकांनी थेट फुलंब्री पोलीस ठाण्यात आणला.

सासरच्यांना अटक होत नाही तोपर्यंत अंत्यसंस्कार न करण्याची भूमिका घेतली. या वेळी पोलिसांना दंगा काबू पथकाला पाचारण करावे लागले. सुनिताचे भाऊ गजानन गवळी (रा. मोढा खुर्द) यांनी तक्रार दिली, की जेसीबीसाठी माहेराहून दोन लाख रुपये आणण्यासाठी सुनीता यांचा छळ केला जात होता. त्यावरून पोलिसांनी पती अण्णा भोकरे, सासू मनूबाई भोकरे, सासरा राजाराम भोकरे, जाऊ गंगूबाई संतोष भोकरे, नणंद भागीनाथ गायकवाड व नणंद राजू कारले यांच्याविरुद्ध गुन्हा दाखल केला. संशयितांना ताब्यात घेतल्याचे व्हिडीओ कॉलद्वारे दाखविले. त्यानंतरच नातेवाइकांनी आंदोलन मागे घेतले. यानंतर रात्री ११:३० वाजता वाणेगाव येथे सुनीता यांच्या पार्थिवावर अंत्यसंस्कार करण्यात आले.