वैजापूरमध्ये बोरनारे बंधूंविरुद्ध डॉ. परदेशींनी ठोकले शड्डू!; उमेदवारी अर्ज भरला

वैजापूर (मेट्रोपोलिस पोस्ट वृत्तपत्राच्या सौजन्याने) : वैजापूर नगरपालिका निवडणुकीत महायुतीच्या दोन मित्रपक्षांतच मुख्य लढत होण्याची शक्यता आहे. नगराध्यक्ष पदासाठी भाजपाचे डॉ. दिनेश परदेशी यांनी उमेदवारी अर्ज भरला आहे. दोन दिवसांपूर्वी आ. रमेश बोरनारे यांचे बंधू संजय बोरनारे यांनी शिंदे गटाकडून नगराध्यक्षपदासाठी अर्ज भरला आहे. विधानसभा निवडणुकीपासून शिंदे गट आणि भाजपमध्ये स्थानिक पातळीवर बिनसलेले असले तरी, आता मुख्यमंत्री देवेंद्र फडणवीस यांच्या सूचनेमुळे पदाधिकाऱ्यांना शिंदे गटाशी दोन हात करताना काळजी घ्यावी लागणार आहे. असे असले तरी नगरपालिका निवडणुकीत दोन्ही पक्षांच्या पदाधिकाऱ्यांत वातावरण गरमच राहणार हे निश्चित आहे.

डॉ. परदेशी यांनी आ. बोरनारे यांच्याविरुद्ध विधानसभा निवडणूक लढवली होती. महायुतीमुळे ते ठाकरे गटात गेले आणि उमेदवारी मिळवून बोरनारे यांना लढत दिली. ४० मतांच्या फरकाने पराभव झाल्यानंतर पुन्हा ते भाजपमध्ये परतले आणि आता नगरपालिका भाजपच्या ताब्यात घेण्यासाठी शड्डू ठोकून आहेत. दुसरीकडे शिंदे गटाचे आ. रमेश बोरनारे यांनी घराणेशाहीचा कित्ता गिरवत भाऊ संजय बोरनारे यांच्या गळ्यात नगराध्यक्षपदाची उमेदवारी टाकली आहे. त्यामुळे त्यांना निवडून आणण्यासाठी ते सर्वोतोपरी प्रयत्न करणार आहेत, हे अलीकडच्या काळात भाजपचे पदाधिकारी शिंदे गटात घेऊन त्यांनी दाखवून दिले आहे. घराणेशाहीमुळे शिंदे गटातील पदाधिकारी काहीसे नाराज झाले आहेत. डॉ. परदेशी यापूर्वी नगराध्यक्ष राहिलेले आहेत. १५-२० वर्षे परदेशी दाम्पत्याने वैजापूर नगरपालिकेवर सत्ता भूषवली आहे.

डॉ. परदेशींना वाणी समर्थकांची साथ मिळणार
डॉ. परदेशी यांनी उमेदवारी अर्ज निवडणूक निर्णय अधिकारी डॉ. अरुण जऱ्हाड यांच्याकडे रविवारी (१६ नोव्‍हेंबर) दाखल केला. दरम्यान, माजी आमदार दिवंगत आर. एम. वाणी यांचे पूत्र सचिन वाणी यांनी ठाकरे गटाकडून भाजपमध्ये प्रवेश करण्याचे ठरवले असून, त्यांचा भाजप प्रवेश १८ नोव्हेंबरला मुंबई येथे होणार असल्याचे डॉ. दिनेश परदेशी यांनी सांगितले आहे.