Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
सिल्लोड (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर जिल्ह्यात अतिवृष्टीचा सातवा बळी गेला आहे. बनकिन्होळा (ता. सिल्लोड) येथील ३२ वर्षीय शेतकरी रामेश्वर पुंडलिक फरकाडे यांनी शेतातील घरात गळफास घेतला. ही घटना सोमवारी (६ ऑक्टोबर) दुपारी समोर आली.
अतिवृष्टीमुळे पिकांचे अतोनात नुकसान झाल्याने रामेश्वर फरकाडे चिंतित होते. यातूनच त्यांनी स्वतःच्या शेतातील घरात गळफास घेतला. वडोद बाजार पोलिसांना माहिती मिळताच त्यांनी घटनास्थळी धाव घेऊन पंचनामा केला. अधिक तपास पोलीस अंमलदार धनराज खाकरे करत आहेत. दुपारी तहसीलदार सतीश सोनी यांनी बनकिन्होळा येथे येऊन फरकाडे कुटुंबीयांची भेट घेऊन सांत्वन केले. रामेश्वर फरकाडे यांच्या पश्चात आई, पत्नी, भाऊ आणि भावजय असा परिवार आहे.
यापूर्वी छत्रपती संभाजीनगर जिल्ह्यात रमेश वसंत कळसकर (वय २८, रा. लोहगाव, ता. पैठण), मधुकर सर्जेराव पळसकर (वय ५४, रा. बकापूर पळशी, ता. छत्रपती संभाजीनगर), गोकुळ सुरेश दणके (वय ३५, रा. चिंचोली नकीब, ता. फुलंब्री), आप्पासाहेब कोंडीराम पळसकर (वय ५५, रा. बकापूर पळशी, ता. छत्रपती संभाजीनगर), रामेश्वर हिरा राठोड (वय २५, रा. धिंगापूर, ता. सोयगाव), सतीश कारभारी निकम (वय ४५, रा. हिंगणा, ता. वैजापूर) या शेतकऱ्यांनी अतिवृष्टीमुळे झालेले नुकसान आणि त्यामुळे कर्ज फेडता येणार नसल्याने आत्महत्या केल्या आहेत. जिल्ह्यात ७ बळी जाऊनही सरकार आणि प्रशासन मात्र पंचनामे करण्यातच वेळकाढूपणा करत असल्याचा आरोप होत आहे.
