पैठण गेट परिसरातील अतिक्रमित दुकानांवर उद्या चालणार बुलडोझर!‌

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : पैठण गेटवरील अतिक्रमित दुकानांवर लवकरच बुलडोझर चालणार आहे. युवकाच्या हत्‍येनंतर अतिक्रमणांचा प्रश्न ऐरणीवर आला आहे. महापालिकेच्या पथकाने गुरुवारी (१३ नोव्‍हेंबर) मुख्य रस्त्यांचे टोटल स्टेशन सर्वेक्षण पूर्ण केले आहे. उद्या, १५ नोव्‍हेंबरपासून अतिक्रमण हटविण्याच्या कारवाईला सुरुवात होणार असल्याचे महापालिकेच्या सूत्रांनी सांगितले.

पैठण गेट सर्कलच्या बाजूने १५ मीटर, पैठण गेटपासून नुतन कॉलनीकडे जाणारा मुख्य रस्ता ३० मीटर आणि सब्जीमंडी परिसरातील अंतर्गत रस्ता ९ मीटरचा आहे. मोजमाप करून अतिक्रमणात येणाऱ्या मालमत्तांवर मार्किंग करण्यात येणार आहे. यामुळे व्यापारी भांबावले असून, पाडापाडीच्या शक्यतेमुळे त्यांनी मुदत देण्याची मागणी केली आहे. नुकसान टाळण्यासाठी अतिक्रमणधारकांनी स्वतःहून अतिक्रमण काढून घ्यावे, असे आवाहन अतिक्रमण निर्मूलन पथकाचे प्रमुख संतोष वाहुळे यांनी केले आहे.

मोबाइल दुकानांचे हब होणार नामशेष...
पैठण गेटचा परिसर मोबाइल दुकानांचे हब म्हणून ओळखला जातो. हत्‍येच्या घटनेनंतर कुरैशी समाजबांधवांनी महापालिकेकडे अतिक्रमित दुकानांची तक्रार केली होती. पैठणगेट ते सिल्लेखाना, पैठणगेट ते सब्जी मंडी व पैठणगेट ते खोकडपुऱ्याकडे जाणाऱ्या रस्त्यावर पोलिसांच्या मदतीने आता अतिक्रमणांवर बुलडोझर चालवला जाणार आहे. मुकुंदवाडीत तरुणाची हत्‍या झाल्यानंतर पोलीस आणि महापालिकेने मिळून शहरात ऐतिहासिक अशी अतिक्रमण हटाव मोहीम राबवून ५५०० मालमत्ता जमीनदोस्त करत रस्ते मोकळे केले. आता पैठणगेट येथील एस. एस. मोबाईल शॉपीसमोर सोमवारी (१० नोव्‍हेंबर) रात्री सव्वा दहाच्या सुमारास शेख परवेज शेख मेहमूद (वय ३६, सब्जीमंडी) याने इमरान अकबर कुरेशी (वय ३३, रा. सिल्लेखाना) याची चाकूने गळा चिरून हत्या केली. परवेजचे दुकान अतिक्रमणात आहे. त्यामुळे कुरैशी समाजाने अतिक्रमित दुकानांचा मुद्दा उचलून धरला आहे.