सिडकोत टवाळखोराचा कहर : सरकारी अधिकारी महिलेच्या कारचा पाठलाग करून दगडाने काच फोडली, अश्लील शिवीगाळ

By City News Desk

On 19 Jan 2026

सिडकोत टवाळखोराचा कहर : सरकारी अधिकारी महिलेच्या कारचा पाठलाग करून दगडाने काच फोडली, अश्लील शिवीगाळ

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : सिडकोत टवाळखोराने कहरच केला. एका सरकारी अधिकारी महिलेच्या कारचा पाठलाग करून नंतर दगडाने मागील काच फोडून नुकसान केले. अश्लील शिवीगाळ केली. त्यावरून सिडको पोलिसांनी टवाळखोराविरुद्ध रविवारी (१८ जानेवारी) गुन्हा दाखल केला आहे.

अनुराधा बळीराम पाटील (वय ३५, रा. मयूरपार्क सुरेवाडी) यांनी या प्रकरणात तक्रार दिली आहे. त्या फुलंब्रीच्या तहसील कार्यालयात पुरवठा निरीक्षण अधिकारी आहेत. रविवारी (१८ जानेवारी) रात्री साडेनऊच्या सुमारास त्या वडिलांना मेडिकव्हर हॉस्पिटलमध्ये भेटण्यासाठी गेल्या होत्या. कारने परत येत असताना चिश्तिया चौकातून पुढे आल्यावर रस्त्यावर अचानक एक दुचाकीस्वार थांबला.

त्याला बाजूला होण्यासाठी पाटील यांनी हॉर्न वाजवला. मात्र तो बाजूला झाला नाही. त्यानंतर पुन्हा हॉर्न वाजवला असता त्याने मागे पाहून शिवीगाळ केली. नंतर मागे मागे येऊन एम २ रोड निमाई हॉस्पिटलच्या जवळ दगड मारून कारची मागील काच फोडली. त्यानंतर पाटील यांनी सिडको पोलीस ठाणे गाठून तक्रार दिली. त्यावरून पोलिसांनी त्या दुचाकीस्वाराविरुद्ध गुन्हा दाखल केला असून, त्याची ओळख पटवली जात आहे. अधिक तपास पोलीस अंमलदार शिवाजी भोसले करत आहेत.