गजानन महाराज मंदिर परिसरातील न्यू बाविस्कर सराफा दुकानावर भरदिवसा दरोडा घालण्याचा प्रयत्न फसला!; ५ जण अंगठी घेण्याच्या निमित्ताने आले अन्‌...

छत्रपती संभाजीनगर (मेट्रोपोलिस पोस्ट वृत्तसेवा) : गजानन महाराज मंदिर परिसरातील न्यू बाविस्कर या सराफा दुकानावर भरदिवसा दरोडा घालण्याचा प्रयत्न दुकानदाराच्या सतर्कतेमुळे टळला. पाच जण दरोडा घालायला आले होते. चौघे पळाले. एक पोलिसांच्या हाती लागला. त्याच्याकडून धारदार चाकू जप्त करण्यात आला आहे. ही घटना रविवारी (४ जानेवारी) दुपारी ३ च्या सुमारास घडली.

सराफा व्यावसायिक गणेश देविदास बाविस्कर (वय ४५, रा. आकाशवाणी फ्रिडम टॉवर) यांनी या प्रकरणात तक्रार दिली आहे. त्यांचे न्यू बाविस्कर नावाचे सोने-चांदी दागिने विक्रीचे दुकान गजानन महाराज मंदिर चौकाजवळील सारंग सोसायटीत आहे. रविवारी (४ जानेवारी) ते दुकानावर असताना दुपारी तीनच्या सुमारास दोन अनोळखी व्यक्ती (वय अंदाजे २५ ते ३०) अंगठ्या घेण्यासाठी दुकानात आले. विनाकारण विचारपूस करत थांबले. त्यानंतर काहीवेळाने आणखी ३ अनोळखी व्यक्ती (वय अंदाजे २० ते २५) आले. तेही खूप वेळ विनाकारण अंगठ्या पाहत होते. ते दुकानाच्या आतबाहेर येणे- जाणे करत होते. त्यांचे वागणे बाविस्कर यांना संशयास्पद वाटल्याने त्यांनी त्या पाचही जणांना अंगठ्या विक्री करायच्या नाहीत, असे म्हटले.

त्यावर ते म्हणाले, तुम्हाला किती पैसे पाहिजे? त्यावर बाविस्कर म्हणाले, की अंगठ्या घ्यायच्या असतील तर पैसे घेऊन या. त्यावर ते वाद घालत तेथेच थांबले. बाविस्कर यांनी त्या सर्वांना दुकानाबाहेर काढले. तरीही ते दुकानाजवळ फिरत होते. त्यामुळे बाविस्कर यांनी पुंडलिकनगर पोलिसांना कॉल करून बोलाविले. पोलीस आल्याचे पाहून ते पळून जाऊ लागले. त्यापैकी एकाला पकडण्यात बाविस्कर आणि पोलिसांना यश आले. त्याने पोलिसांना त्याचे नाव बंटी शिंदे (वय २४, रा. नांदेड) असे सांगितले. पोलिसांनी त्याला पुंडलिकनगर पोलीस ठाण्यात नेले. तेथे त्याची झडती घेतली असता त्याच्याकडे कमरेला एक धारदार चाकू मिळून आला. अधिक तपास सहायक पोलीस उपनिरीक्षक सुनील मस्के करत आहेत.