१८ वर्षांच्या दोन तरुणांनी सुसाट स्पोर्ट्‌स बाईकने बुलेटला उडवले, भाजप माजी नगरसेवक वीरकर यांचा मृत्‍यू, चिकलठाणा MIDC तील घटना

छत्रपती संभाजीनगर (सीएससीएन वृत्तसेवा) : भाजपचे गुलमोहर कॉलनी येथील माजी नगरसेवक अशोक गोरखनाथ वीरकर (वय ५५, रा. गुलमोहर कॉलनी) यांच्या बुलेटला सुसाट स्पोर्ट्‌स बाइकने जोरात धडक दिली. यात वीरकर यांचा मृत्‍यू झाला. हा अपघात चिकलठाणा एमआयडीसीतील ब्रँडी कंपनीसमोर गुरुवारी (२० फेब्रुवारी) रात्री १२ च्या सुमारास घडला.

स्पोर्ट्‌स बाइकवरील शेख अमान शेख इरफान (वय १८) आणि शेख शब्बीर शेख अतिक (वय १८, दोघे रा. पॉवरलूम) गंभीर जखमी झाले. त्‍यांच्यावर घाटी रुग्णालयात उपचार करण्यात येत आहेत. अशोक वीरकर हे बुलेटने (क्र. एमएच २० जीएल २१२२) गुरुवारी सायंकाळी कामानिमित्त चिकलठाणा परिसरात गेले होते. रात्री साडेअकराला घरी परतत असताना सिडको एमआयडीसी पोलीस ठाण्याच्या दिशेने जात होते. याचवेळी उत्तरानगरीकडून धूत रुग्णालयाच्या दिशेने यामाहा एफझेड (क्र. एमएच २० एचए ४४६८) या स्पोर्ट्‌स बाइकवरून अमान व शब्बीर सुसाट निघाले होते. त्‍यांनी बुलेटवरील वीरकर यांना जोरात धडक दिली.

कुणीही हेल्मेट घातलेले नव्हते. वीरकर आणि दोन्ही तरुण गंभीर जखमी झाले. अपघाताची माहिती मिळताच पोलीस अंमलदार समाधान उबाळे, साहेब खान पठाण यांनी तत्‍काळ घटनास्‍थळी येऊन जखमींना घाटी रुग्णालयात दाखल केले. मात्र वीरकर यांना तपासून डॉक्टरांनी मृत घोषित केले. दोन्ही वाहने धडकताच मोठा आवाज झाला. वीरकर दुचाकीसह फेकले गेल्यानंतर त्‍यांचा उजवा हात तीन ठिकाणी तुटला. डोके आणि चेहऱ्याला जबर मार लागला. तपास पोलीस अंमलदार साहेब खान पठाण करत आहेत. वीरकर यांच्या पश्चात आई, पत्‍नी, दोन मुली असा परिवार आहे. घटनेची नोंद सिडको एमआयडीसी पोलिसांनी घेतली असून, अधिक तपास केला जात आहे.