शिवसेना, भाजप, राष्ट्रवादी, ठाकरे गट अन्‌ पुन्हा भाजप... दत्ता गोर्डेंचे हे कितवे पक्षांतर?

छत्रपती संभाजीनगर (विशेष प्रतिनिधी : मेट्रोपोलिस पोस्ट वृत्तसेवा) : पैठणचे माजी नगराध्यक्ष दत्ता गोर्डे हे पुन्हा एकदा भाजपात आले आहेत. शिवसेना, भाजप, राष्ट्रवादी काँग्रेस, नंतर ठाकरे गटात घरवापसी आणि आता नगरपालिका निवडणुकीत पराभवाचे तोंड पाहिल्यानंतर पुन्हा भाजपमध्ये आले आहेत. इतक्या वेळा पक्षांतर करणाऱ्या नेत्याकडून आता भाजपला पैठणमध्ये बस्तान बसविण्याच्या मोठ्या आशा आहेत.

दत्ता गोर्डे यांनी २०१९ मध्ये राष्ट्रवादी काँग्रेसकडून पैठण विधानसभा निवडणूक लढवत ६९ हजार मते घेतली होती. त्यावेळी शिवसेनेच्या संदीपान भुमरे यांच्याकडून ते पराभूत झाले होते. २०२४ मध्ये त्यांना शिवसेनेच्या विलास भुमरे यांनी पराभूत केले. सन २०१८ मध्ये शिवसेनेत असताना त्यांनी विधानसभेसाठी दावेदारी सुरू केली होती. त्यामुळे पक्षातून हकालपट्टी करण्यात आली होती. नंतर ते भाजपमध्ये गेले होते. मात्र ऐन विधानसभा निवडणुकीच्या तोंडावर राष्ट्रवादी काँग्रेसमध्ये गेले आणि विधानसभेचे तिकीट मिळवून २०१९ च्या विधानसभा निवडणुकीच्या रिंगणात उरतले होते. तत्पूर्वी ते २००६ मध्ये शिवसेनेचे पैठण उपनगराध्यक्ष होते. २०१४ ते २०१७ या काळात पैठण नगराध्यक्ष राहिले. नगरसेवक, उपनगराध्यक्ष, नगराध्यक्ष आणि विधानसभेचे दावेदार अशी त्यांची राजकीय कारकीर्द राहिली आहे.

शिवसेनेच्या ठाकरे गटात प्रवेश केल्यानंतर घरवापसी केल्यानंतर ते खासदार संदिपान भुमरे आणि आमदार विलास भुमरे यांना आव्हान देत होते. अलीकडेच पार पडलेल्या पैठण नगरपालिका निवडणुकीत नगराध्यक्षपदासाठी त्यांची पत्नी उमेदवार होत्या. मात्र त्यांचा पराभव झाला. ठाकरे गटात राजकीय भवितव्य दिसत नसल्याने त्यांनी भाजपात जाण्याचा निर्णय घेतला आणि आज, १९ जानेवारीला रावसाहेब दानवे यांच्या उपस्थितीत भाजपात दाखल झाले. गोर्डे यांची इतकी पक्षांतरे घडले आहेत, की ते कोणत्या निवडणुकीच्या तोंडावर कोणत्या पक्षात राहतील, याबद्दल साशंकता असते, अशी चर्चा आता पैठण तालुक्यात होत असते. आता जिल्हा परिषद निवडणुकीच्या तोंडावर ते ठाकरे गटातून भाजपात आले आहेत.

संदिपान भुमरे यांनी जी गद्दारी उद्धव ठाकरे यांच्यासोबत केली, त्यामुळे त्यांना गाडण्यासाठी म्हणून आपण ठाकरे गटात येत असल्याचे त्यावेळी गोर्डे यांनी ठाकरे गटात येताना म्हटले होते. भुमरे यांचे कोणतेही राजकीय नुकसान करू शकत नसल्याची प्रचिती आल्यानंतर त्यांनी आता थेट ठाकरेंचीच साथ सोडणे योग्य समजले असावे, अशी टोलेबाजी पैठणच्या राजकीय वर्तुळात सुरू झाली आहे. पैठण विधानसभा मतदारसंघात शिवसेनेचे आमदार संदिपान भुमरे यांचे वर्चस्व राहिले आहे. या मतदारसंघातली जातीय समीकरणे पाहिली तर हा मतदार संघ मराठा बहुल आहे. त्या पाठोपाठच ओबीसींची मते आहेत. पैठण तालुक्यातील वजनदार नेते अण्णासाहेब लबडे, विनोद बोंबले, नंदलाल काळे, राजूनाना भुमरे, अशोक भवर, बाबूराव पडूळ असे अनेक जण भुमरे यांच्यासोबत आहेत. भाजपला आता गोर्डे यांच्या निमित्ताने पैठणमध्ये बळ लावता येईल, अशी शक्यता आहे.