ठाकरे गटाच्या महिला सरपंच असल्याने प्रशासनाकडून दुजाभाव?, मावसाळाच्या राजेश्री देवगिरीकर यांनी राजीनामा दिल्याने खळबळ

By City News Desk

On 07 Aug 2025

ठाकरे गटाच्या महिला सरपंच असल्याने प्रशासनाकडून दुजाभाव?, मावसाळाच्या राजेश्री देवगिरीकर यांनी राजीनामा दिल्याने खळबळ

खुलताबाद (सीएससीएन वृत्तसेवा) : खुलताबाद तालुक्‍यातील मावसाळा येथील सरपंच राजेश्री अतीश देवगिरीकर यांनी यांनी बुधवारी (६ ऑगस्ट) तडकाफडकी राजीनामा देत प्रशासनावर गंभीर आरोप केले आहेत. मी ठाकरे गटाची कार्यकर्ती असल्यानेच मावसाळा गावाबाबत शासन, प्रशासनाकडून दुजाभाव केला जात असल्याचा आरोप त्‍यांनी केला आहे. त्‍यामुळे खळबळ उडाली आहे. खुलताबादच्या गटविकास अधिकाऱ्यांकडे राजेश्री यांनी राजीनामा सुपूर्द केला.

राजेश्री देवगिरीकर यांनी म्हटले आहे, की खुलताबाद तालुक्यात अनेक वर्षांपासून सत्ताधारी पक्षाच्या लोकांचीच कामे केली जात असून, विरोधी पक्षाच्या कार्यकर्त्यांची कामे दुर्लक्षित केली जात आहेत. मावसाळाच्या समस्या अन्‌ मागण्या अनेक महिन्यांपासून प्रलंबित आहेत. प्रशासन जाणीवपूर्वक दुर्लक्ष करत आहे. त्याचा परिणाम गावाच्या विकासावर झाला आहे. मी ठाकरे गटाची असल्यानेच शासन आणि प्रशासनाकडून दुजाभाव होत आहे. प्रशासन गावाच्या समस्या सोडवत नसल्याने आगामी निवडणुकांवर बहिष्कार टाकण्याचा ठरावही ग्रामस्थांनी मंगळवारी (५ ऑगस्ट) ग्रामसभेत घेतला आहे. मात्र या ग्रामसभेलाही जिल्हा परिषदेच्या विविध अधिकारी, कर्मचाऱ्यांनी दांडी मारली, असा आरोप राजेश्री देवगिरीकर यांनी केला आहे.