चौका घाटातील भीषण अपघातातून सुदैवाने बचावले एकाच कुटुंबातील ६ जण!, ट्रॅक्टर उलटून उसाखाली दबली कार...

By City News Desk

On 06 Dec 2025

चौका घाटातील भीषण अपघातातून सुदैवाने बचावले एकाच कुटुंबातील ६ जण!, ट्रॅक्टर उलटून उसाखाली दबली कार...

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

फुलंब्री (मेट्रोपोलिस पोस्ट वृत्तसेवा) : छत्रपती संभाजीनगर-जळगाव मार्गावरील चौका घाटातील भीषण अपघातातून एकाच कुटुंबातील सहा जण बचावले आहेत. ट्रॅक्टरची उसाने भरलेली ट्रॉली अचानक उलटली. मागे धावणाऱ्या कारवर सर्व ऊस कोसळला. कार उसाखाली दबली होती. ही घटना शुक्रवारी (५ डिसेंबर) सकाळी दहाला घडली. या अपघातामुळे दोन तास घाटात वाहतूक कोंडी झाली.

ट्रॅक्टर वरझडी (ता. अंबड, जि. जालना) येथून खुलताबाद येथील घृष्णेश्वर साखर कारखान्याला ऊस घेऊन जात होता. त्याला दोन ट्रॉली जोडलेल्या होत्या. दोन्ही ट्रॉलींत ऊस होता. चौका घाटातील उंच टेकडावर चढताना ट्रॅक्टरचा रॉड तुटला. ट्रॅक्टर मागे घसरत जाऊन ट्रॉली उलटली. याच वेळी मागून कार येत होती. उलटलेल्या ट्रॉलीतील ऊस कारवर कोसळला. कारमध्ये वाळूज येथील उमराव अभिमान पाटील, त्यांचे आई-वडील, पत्नी, दोन मुले होती. ते सर्व जण दबले गेले. नागरिकांनी तातडीने मदतकार्य करत सर्वांना सुरक्षित बाहेर काढले. अपघातानंतर ट्रॅक्टरचालक घटनास्थळावरून फरारी झाला. उमराव पाटील यांच्या तक्रारीवरून फुलंब्री पोलिसांनी ट्रॅक्टरचालकाविरुद्ध गुन्हा दाखल केला आहे. अधिक तपास पोलीस अंमलदार शेख मुजीब करीत आहेत. अपघातामुळे घाटात वाहतूक कोंडी झाली. दोन किलोमीटरपर्यंत वाहनांच्या रांगा लागल्या.