लग्नाला २ तास बाकी होते, नवरीचा मेकअप सुरू होता, तितक्यात मंडपात पोलिसांची एंट्री!; म्हणाले, थांबा... हे लग्न नाही होऊ शकणार!!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : रस्त्यालगत लग्नमंडप उभारला, वऱ्हाडी मंडळीही आली. जेवणाची तयारी सुरू होती. मंडपात हळदीचा कार्यक्रम झालेला होता. नवरीचा मेकअप सुरू होता. दोन तासांत वधू-वरावर अक्षता पडणारच होत्या... पण तितक्यात पोलीस येऊन धडकले. वधू अल्पवयीन असल्याच्या संशयावरून कागदपत्रांची तपासणी करण्यात आली. वधू अवघ्या १६ वर्षांची निघाली. पोलिसांनी लग्न थांबवून वधू-वराच्या नातेवाइकांना समजावून सांगितले. कायद्याची माहिती दिली. त्यामुळे लग्न रद्द करण्यात आले. वधूचे वय होईपर्यंत लग्न न लावण्याचे लेखी घेण्यात आले... पोलीस येऊन धडकताच वराला मात्र नातेवाइकांनी आधीच गायब केले होते. छत्रपती संभाजीनगर शहरातील हमालवाडा येथे रविवारी (२ नोव्‍हेंबर) सकाळी १० वाजता हा प्रकार घडला.

१६ वर्षीय मुलीचा २५ वर्षीय मुलासोबत विवाह होणार असल्याची माहिती जिल्हाधिकाऱ्यांना मिळाली होती. त्यांनी जिल्हा महिला व बाल विकास समिती आणि दामिनी पथकाला कारवाईचे आदेश दिले. सातारा पोलीस ठाण्याच्या हद्दीत येणाऱ्या हमालवाड्यात थाटामाटात लग्नाची तयारी केलेली होती. दामिनी पथकाने माहिती घेतली असता लग्न दुपारी १२.३० वाजता लागणार असल्याचे कळले. त्यांनी लग्नमंडपात अचानक एंट्री केली. त्यामुळे एकच गोंधळ उडाला.

पथकाने नातेवाइकांची चौकशी केली. मुलीचे वय १६ वर्षे असल्याचे समोर आले, तर नवरदेव २५ वर्षांचा होता. नगर जिल्ह्यातील शिर्डी येथू वऱ्हाड आले होते. दोन्हीकडील नातेवाइकांना कायद्याची माहिती देत विवाह रोखायला सांगितला.  नवरी जालना जिल्ह्यातील शहागडची, तर नवरदेव शिर्डीचा होता. मुलगी १२ वीत शिकते. तिच्या आईचे माहेर हमालवाडा येथे आहे. मुलीचे वडील दारूच्या आहारी गेलेले असल्याने आईच्या माहेरच्यांनी लग्नाचा निर्णय घेतला होता. लग्नाचा खर्च काका, मावशी, मामा यांनी उचलला होता. नवरदेव चहाटपरी चालवतो. मुलीने दामिनी पथकाला सांगितले, की मला शिकायचे होते. पण घरच्या परिस्थतीमुळे लग्नास तयार झाली. यावेळी नवरीला अश्रू आवरता आले नाहीत.