Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : नशेत धुंद असलेल्या सुसाट कारचालकाने स्कुटीस्वार स्विगी बॉयला उडवले. यात स्विगी बॉय गंभीर जखमी झाला असून, त्याच्यावर एमजीएम रुग्णालयात उपचार सुरू आहेत. प्रकृती चिंताजनक आहे. ही घटना जालना रोडवर हॉटेल ॲम्बॅसॅडरसमोर मंगळवारी (११ नोव्हेंबर) रात्री साडेअकराच्या सुमारास घडली.
साईनाथ रामकिसन देवकर (वय ३५, रा. मुकुंदवाडी रामनगर) असे गंभीर जखमीचे नाव असून, कारचालक चेतन रमेश पाटील (वय ३८, रा. एन ४ सिडको गुरुसहानीनगर) याच्याविरुद्ध पोलिसांनी गुन्हा दाखल केला आहे. साईनाथची आई कांताबाई रामकिसन देवकर (वय ५०, रा. मुकुंदवाडी रामनगर) यांनी पाटीलविरुद्ध तक्रार दिली आहे. त्या पती, मोठा मुलगा साईनाथ, लहान मुलगा रामेश्वर यांच्यासह राहतात. साईनाथ एमजीएम हॉस्पिटलमध्ये सिक्युरिटी गार्ड असून, स्विगीमध्येही डिलिव्हरी बॉय म्हणून पार्टटाइम जॉब करतो. बुधवारी पहाटे साडेबाराला (मध्यरात्री) साईनाथ घरी न आल्याने लहान भाऊ रामेश्वरने कॉल केला असता पोलिसांनी कॉ उचलला आणि सांगितले, की हॉटेल ॲम्बॅसॅडरसमोर तुझ्या भावाचा अपघात झाला असून, त्याला एमजीएम हॉस्पिटलमध्ये भरती केले आहे, असे सांगितले.
त्यामुळे देवकर दाम्पत्यासह लहान मुलाने लगेचच एमजीएम हॉस्पिटल गाठले. साईनाथ बेशुध्दावस्थेत आयसीयूत होता. त्यावेळी त्याला उपचारासाठी आणून दाखल केलेल्या लोकांकडून व पोलिसांकडून साईनाथच्या आईला कळले, की मंगळवारी रात्री साडेअकराला साईनाथ हा स्कुटीने घरी येत असताना हॉटेल ॲम्बॅसॅडरसमोर मागून येणाऱ्या स्कोडा कारने (MH20 HB 6452) त्याला उडवले. त्यावेळी चालक चेतन रमेश पाटील हा कार दारूच्या नशेत भरधाव व निष्काळजीपणे चालवत होता. स्कुटीला त्याने जोरात धडक दिल्याने साईनाथ गाडीसह रोडवर जोरात पडला. त्याच्या डोक्याच्या उजव्या बाजूला व उजव्या हाताला मार लागल्याने तो जागेवरच बेशुध्द पडला. सध्या साईनाथची प्रकृती चिंताजनक आहे. अधिक तपास पोलीस उपनिरीक्षक निवृत्ती गायके करत आहेत.
