धक्कादायक : अवघा १७ वर्षांचा मुलगा ड्रग्ज रॅकेटमध्ये सक्रीय!; कटकट गेटजवळ पोलिसांनी पकडले

छत्रपती संभाजीनगर (मेट्रोपोलिस पोस्ट वृत्तसेवा) : अवघ्या १७ वर्षांचा मुलगा ड्रग्‍ज रॅकेटमध्ये सक्रीय असल्याचे समोर आल्याने पोलिसांनाही धक्का बसला. बुधवारी (१७ डिसेंबर) सायंकाळी पाचच्या सुमारास या मुलाला कटकट गेट रोडवरील रवींद्र कॉलनीच्या बाजूला असलेल्या अनिसा शाळेजवळील मैदानावर पोलिसांनी रंगेहात पकडले.

अंमलीपदार्थ प्रतिबंध विभागातील पोलीस अंमलदार सतिश जाधव यांनी याप्रकरणात तक्रार दिली आहे. पोलीस उपनिरीक्षक अमोल म्हस्के यांना गुप्त बातमीदारामार्फत माहिती मिळाली की, पांढरी हुडी आणि जिन्स पॅन्ट घातलेला अल्पवयीन मुलगा कटकट गेट रोडवरील रवींद्र कॉलनीच्या बाजूला असलेल्या अनिसा शाळेजवळील मैदानावर नशेच्या औषधी बाटल्या विकत आहे. यामुळे सहायक पोलीस निरीक्षक श्री. गच्चे, पोलीस उपनिरीक्षक अमोल म्हस्के, पोलीस अंमलदार लाला पठाण, विजय त्रिभुवन, नीतेश सुंदर्डे, वाहन चालक पोलीस अंमलदार गणेश काळे यांनी लगेचच अनिसा शाळेजवळील मैदान गाठले. तिथे संशयित मुलाला पकडले. तो १७ वर्षांचा होता, जिन्सीतील गिरणी मैदानाजवळ राहत असल्याचे त्याने पोलिसांना सांगितले. पोलिसांनी त्याची झडती घेतली असता नशेच्या औषधाच्या २७ बाटल्या (किंमत १० हजार ८०० रुपये) मिळून आल्या. त्याच्याकडील १० हजारांचा मोबाइलही पोलिसांनी जप्त केला. या औषधी बाटल्या त्याने अविनाश पाचुंदे (रा. अनिसा शाळेमागे) याच्याकडून आणल्याचे सांगितले. अधिक तपास पोलीस अंमलदार गौतम वावळे करत आहेत.