मॅरिड असतानाही दुसऱ्या लग्नाचा घाट, लग्न मोडताच बिथरलेल्या युवकाचा सामाजिक कार्यकर्तीवर प्राणघातक हल्ला, वाळूज MIDC तील घटना

छत्रपती संभाजीनगर (मेट्रोपोलिस पोस्ट वृत्तसेवा) : आधी विवाहित असतानाही दुसऱ्या लग्नाचा घाट रचणाऱ्या युवकाबद्दल मुलीच्या घरच्यांना कळल्याने त्यांनी लग्न मोडण्याचा निर्णय घेतला. साखरपुडा मोडत असल्याचे सांगण्यासाठी व त्याने दिलेले दागिने परत करण्यासाठी एका सामाजिक कार्यकर्तीला सोबत घेऊन मुलीच्या नातेवाइकांनी युवकाचे घर गाठले. मात्र तिथे सामाजिक कार्यकर्तीसह मुलीच्या नातेवाइकांवर प्राणघातक हल्ला करण्यात आला. यात सामाजिक कार्यकर्ती आणि मुलीच्या नातेवाइक महिला जखमी झाल्या आहेत. ही घटना आज, ३० नोव्‍हेंबरला सकाळी ११ च्या सुमारास वाळूज एमआयडीसी परिसरातील रांजणगाव शेणपुंजी येथे घडली.

सुवर्णा शंकर पंडीत (वय ३९, रा. आंबेडकरनगर जोगेश्वरी) यांनी या प्रकरणात तक्रार दिली आहे. त्या सामाजिक कार्य करतात. पती, दोन मुलींसह राहतात. त्यांचे किराणा दुकान आहे. संशयित केशव तपासे हा कुटुंबासह रांजणगाव शेणपुंजी येथील बंजारा कॉलनीत राहतो. शनिवारी (२९ नोव्‍हेंबर) सायंकाळी सातला सुवर्णा यांच्या दोन नातेवाइक महिला त्यांच्याकडे आल्या. त्यातील एकीच्या बहिणीचा साखरपुडा केशव तपासेसोबत १९ नोव्‍हेंबरला झाला आहे. मात्र त्याचे पूर्वी लग्न झाले असल्याचे आम्हाला कळल्याने साखरपुडा मोडायचा आहे. त्यांनी साखरपुड्यात दिलेले सोन्याचे दागिने परत करायचे आहे. त्यासाठी तुम्ही मध्यस्थीसाठी चला, असे त्या नातेवाइक महिला म्हणाल्या. त्यामुळे आज सकाळी ११ ला सुवर्णा, २ नातेवाइक महिला आणि १ तरुण मुलगा असे चौघे केशव तपासेच्या घरी गेले. तिथे गेल्यावर साखरपुडा मोडायचा असल्याने तुम्ही दिलेले दागिने परत करायला आलो, असे नातेवाइक महिलेने तपासेला सांगितले.

तुम्हाला दिलेली सोन्याची अंगठी परत द्या, असे म्हटले. त्यावर तपासे याने नातेवाइक महिलांसह सुवर्णा पंडित यांना शिवीगाळ करण्यास सुरुवात केली. तिथे असलेल्या दोन महिलांनी सुवर्णा यांना हाताचापटाने मारहाण करण्यास सुरुवात केली. तीक्ष्ण वस्तूने हातावर मारल्याने मुलीच्या नातेवाइक महिला जखमी झाल्या. सुवर्णा यांची गळ्यातील सोन्याची पोत व एका  नातेवाइक महिलेची पोत तुटून पडली. दोन्ही पोती अर्धवट मिळून आल्या. तपासे याने परत तुम्ही आमच्या घरी आल्या तर जीवे मारू, अशी धमकी दिली. घाटी रुग्णालयात उपचार घेतल्यानंतर सर्वांनी उपचार घेतल्यानंतर सुवर्णा यांनी या प्रकरणात तक्रार दिली आहे. त्यावरून पोलिसांनी केशव तपासे, अविनाश दुधमल, धम्मशीला जोंधळे, उमा दुधमल यांच्याविरुद्ध गुन्हा दाखल केला आहे. अधिक तपास पोलीस अंमलदार राम तांदळे करत आहेत.