२१ वर्षीय विवाहितेचे पतीवर गंभीर आरोप; तो घरी मुली घेऊन यायचा,  माझे प्रेमप्रकरण आहे म्हणायचा!, सिटी चौक पोलिसांत गुन्हा दाखल

छत्रपती संभाजीनगर (सीएससीएन वृत्तसेवा) : सिटी चौक पोलीस ठाण्यात २१ वर्षीय विवाहितेने तक्रार करताना पतीवर गंभीर आरोप केले आहेत. शारीरिक व मानसिक छळाबरोबरच तो चारित्र्यावर संशय घेऊन मारहाण करायचा. घरी मुली घेऊन येत माझे प्रेमप्रकरण आहे असे म्‍हणायचा, असे विवाहितेने तक्रारीत म्‍हटले आहे. त्‍यावरून पोलिसांनी तिच्या २५ वर्षीय पतीविरुद्ध गुन्हा दाखल केला आहे.

२१ वर्षीय वृषाली (नाव बदलले आहे) हिने या प्रकरणात तक्रार दिली आहे. तिचे सासर वाळूजचे भारतनगर आहे. सध्या आई-वडिलांकडे एन १२ भारतमातानगर, दाभाडेनगर येथे अडीच वर्षांपासून राहत आहे. तक्रारीनुसार, तिचे लग्न २५ जुलै २०२१ रोजी झाले. पतीने जानेवारी २०२२ पासून छळायला सुरुवात केल्याचे विवाहितेने तक्रारीत म्‍हटले आहे. मानसिक त्रास देणे, दारू पिऊन रात्री बेरात्री घरी येऊन चारित्र्यावर संशय घेऊन हातात येईल त्या वस्तूने मारहाण करणे, दोन दोन दिवस घरी येत नसे, फोनमध्ये व्यस्त राहून कामाला जाणे टाळायचा.

त्यानंतर त्याने नोकरी सोडून दिली. तो घरी मुली घेऊन येऊ लागला. तिला म्हणत असे, की "तू येथे माझ्यासोबत राहू नको, निघून जा, माझे प्रेमप्रकरण आहे, तुला नांदायचे असेल तर नांद नाही तर निघून जा. वृषालीने त्‍याला नकार दिल्यावर तो शिवीगाळ करून हाताचापटाने तिला मारहाण करत असे. तू तुझ्या आई-वडिलांकडून घरखर्चासाठी पैसे घेऊन ये, असे म्हणून तो दारू पिऊन येत तिला शिवीगाळ करून हाताचापटाने मारहाण करायचा, असे विवाहितेने तक्रारीत म्‍हटले आहे. अधिक तपास पोलीस अंमलदार प्रमोद पवार करत आहेत.