छत्रपती संभाजीनगर (सीएससीएन वृत्तसेवा) : धारदार तलवार घेऊन सिग्मा हॉस्पिटल परिसरासह दर्गा चौक व शंभूनगरात दहशत माजविणाऱ्या २० वर्षीय तरुणाला जवाहरनगर पोलिसांनी सापळा रचून शिताफीने पकडले. ही कारवाई शुक्रवारी (१५ नोव्हेंबर) सिग्मा हॉस्पिटलजवळ करण्यात आली.
पोलीस उपनिरीक्षक मारोती खिल्लारे व डायल-११२ चे पोलीस अंमलदार मारोती गोरे यांना गुप्त बातमीदाराने माहिती दिली की, एक व्यक्ती हातात धारदार तलवार घेऊन सिग्मा हॉस्पिटल, दर्गा चौक व शंभूनगर परिसरात दहशत माजवत आहे. घटनेचे गांभीर्य लक्षात घेऊन त्यांनी याची माहिती वरिष्ठ पोलीस निरीक्षक अशोक शरमाळे यांना दिली. त्यांनी तत्काळ कारवाईच्या सूचना केल्या. त्यामुळे पोलीस पथकाने संशयिताचा सिग्मा हॉस्पिटल, दर्गा चौक परिसरात शोध घेतला असता तो सिग्मा हॉस्पिटलजवळील कुंपनाच्या मोकळ्या जागेत झाडाजवळ दिसून आला. पोलिसांना पाहून तो पळू लागला. पोलिसांनी पाठलाग करून त्याला पकडले. त्याची ओळख विचारली असता त्याने त्याचे नाव शेख आदिल शेख जावेद (वय २०, रा. शंभुनगर चाणक्यपुरी ग. नं. १, छत्रपती संभाजीनगर) असे सांगितले.
कसून चौकशीत त्याने सिग्मा हॉस्पिटलजवळील कुंपनात झाडा-झुडपात तलवार ठेवल्याचे सांगितले. पोलिसांनी ही ७० सेंटीमीटर लांबीची तलवार जप्त केली. त्याच्या ताब्यातून मोबाइलही जप्त करण्यात आला. वेळीच त्याच्या मुसक्या आवळण्यात आल्याने त्याच्यापासून होणाऱ्या संभाव्य गंभीर गुन्ह्याला रोखण्यात यश आले. त्याच्याविरुद्ध जवाहरनगर पोलीस ठाण्यात गुन्हा दाखल करण्यात आला आहे. अधिक तपास पोलीस अंमलदार श्री. जमधाडे करत आहेत. ही कारवाई पोलीस आयुक्त प्रवीण पवार, पोलीस उपायुक्त नवनीत काँवत, सहायक पोलीस आयुक्त रंजीत पाटील, वरिष्ठ पोलीस निरीक्षक अशोक उमाजी शरमाळे यांच्या मार्गदर्शनाखाली पोलीस उपनिरीक्षक मारोती हरी खिल्लारे, सहायक फौजदार श्री. शिगाने, पोलीस अंमलदार श्री. पवार, श्री. क्षीरसागर, श्री. बनकर, श्री. काळे, मारोती गोरे, मोफतलाल राठोड, विजय सुरे यांनी पार पाडली.
.jpg)
.jpg)
.jpg)
