छत्रपती संभाजीनगर (सीएससीएन वृत्तसेवा) : छत्रपती संभाजीनगर शहरात नशेखोरांच्या कारवायांनी कळस गाठला आहे. रस्त्यात रात्रीच्या वेळी एकटे कुठे जाणेही अवघड बनलेच होते, पण आता ते जीवघेणे झाले आहे. किरकोळ कारणावरून ३९ वर्षीय युवकावर चाकूचे सपासप वार करून १७ वर्षीय नशेखोराने हत्या केली. ही घटना बुधवारी (१ जानेवारी) रात्री नऊच्या सुमारास फाजलपुऱ्यातील हर्षनगरात घडली.
रणजित सुधाकर दांडगे (वय ३९, रा. टीव्ही सेंटर) असे हत्या झालेल्या युवकाचे नाव आहे. ते नारेगावातील एका खासगी कंपनीत नोकरी करत होते. सासरवाडीकडील कुटुंबात वाढदिवस असल्याने कार्यक्रमात सहभागी होण्यासाठी हर्षनगरात आले होते. रात्री नऊला परिसरातीलच दुकानात ते पायी जात असताना नशेखोराने हटकले. दांडगे यांनी सुरुवातीला दुर्लक्ष केले. मात्र, नशेखोराने पाठलाग सुरू केल्याने त्यांच्यात बाचाबाची झाली. त्यानंतर नशेखोराने जवळील चाकूने रणजित यांच्या थेट छातीवर वार केले. नातेवाइकांनी धाव घेऊन त्यांना घाटी रुग्णालयात नेले.
मात्र छातीत खोलवर वार झाल्याने तोपर्यंत दांडगे यांचा मृत्यू झाला होता. सिटी चौक पोलीस ठाण्याच्या निरीक्षक निर्मला परदेशी, दिलीप चंदन, उपनिरीक्षक अजित दगडखैर यांनी घटनास्थळी धाव घेतली. पोलिसांनी संशयित पिल्या नामक नशेखोराला ताब्यात घेतले. त्याच्या वयाची खातरजमा केली असता तो अल्पवयीन निघाला. त्याच्याविरुद्ध यापूर्वी एक चोरीचा गुन्हा दाखल आहे. अल्पवयीन नशेखोर गोळ्यांची नशा केलेला असल्याचे चित्र होते. दांडगे यांच्या छातीत चाकू खुपसल्यानंतर तो थम्प अप म्हणजेच हात वर करून अंगठा दाखवत होता.
.jpg)
.jpg)
.jpg)
