लाडका किन्नर कोणी काढला का? या तृतीयपंथांचा कोणी आशीर्वाद घेतलाय का?; छत्रपती संभाजीनगरात मुख्यमंत्र्यांसमोर घोषणाबाजी

छत्रपती संभाजीनगर (सीएससीएन वृत्तसेवा) : गेल्या काही दिवसांत शहरात पोलीस आणि तृतीयपंथीयांत सुरू असलेला वाद रविवारी (१२ ऑगस्ट) मुख्यमंत्र्यांसमोर उफाळून आला. टीव्ही सेंटर मैदानावर मुख्यमंत्री एकनाथ शिंदे यांचा आंबेडकरी समाजातर्फे सत्‍कार करून कृतज्ञता व्यक्‍त करण्यात आली. या कार्यक्रमानंतर मुख्यमंत्री जायला निघाले असता तृतीयपंथीयांनी घोषणाबाजी करून लक्ष वेधले. लाडका किन्नर कोणी काढला का? या तृतीयपंथांचा कोणी आशीर्वाद घेतलाय का? असा आक्रोश त्‍यांनी केला. मात्र मुख्यमंत्री शिंदे यांच्यापर्यंत तो आवाज पोहोचलाच नाही…

मुख्यमंत्री शिंदे यांचे भाषण संपले. ते व्यासपीठावरून उतरत असताना तृतीयपंथीयांनी भेट घेण्याचा प्रयत्न केला. मात्र पोलिसांचा तगडा बंदोबस्त असल्याने त्यांना मुख्यमंत्र्यांना भेटता आले नाही. मुख्यमंत्री गेल्यानंतर पत्रकारांसमोर त्यांनी मागण्या आणि समस्या मांडल्या. यावेळी अनेक तृतीयपंथीयांना अश्रू अनावर झाले. शहर पोलिसांनी शहरात भीक मागण्यास बंदी घातल्याने उपासमारीची वेळ आल्याचे त्‍या म्हणाल्या. मुख्यमंत्र्यांनी सध्या लाडका भाऊ, बहीण योजना आणल्या आहेत. त्यांना आमचा विसर पडला आहे, असा उद्वेगही त्‍यांनी व्यक्‍त केला.

मुख्यमंत्री निघताच घोषणाबाजी…
कार्यक्रम झाल्यानंतर मुख्यमंत्री निघून जात असताना तृतीयपंथीयांनी घोषणाबाजी करून मुख्यमंत्र्यांचे लक्ष वेधण्याचा प्रयत्‍न केला. मुख्यमंत्री या कार्यक्रमाला येणार म्हणून तृतीयपंथी दुपारपासूनच कार्यक्रमावर लक्ष ठेवून होते. टीव्ही सेंटर मैदानावर जमले होते. एक तृतीयपंथी म्हणाली की, आम्हाला सिग्नलवर पैसे मागू दिले जात नाही. आमच्यावर कारवाई होत आहे.आ म्हाला सगळ्यांनी नाकारलं, आम्हाला जगणं मुश्किल झाले असल्याचं तृतीयपंथी म्हणाली. मुख्यमंत्र्यांना आमच्यासाठी दोन मिनिटेही नाहीत. कार्यक्रम संपल्यानंतर तृतीयपंथीयांच्या आक्रोशाने सर्वच स्तब्ध झाले होते.

काय आहे वाद…
गेल्या काही दिवसांपूर्वी काही तृतीयपंथीयांनी शहरातील चौकात वाहनधारकांकडे जबरदस्ती पैसे मागण्यास सुरुवात केली होती. काही शोरूममध्येही तृतीयपंथी घुसून नागरिकांकडे पैसे मागत होते. हे करताना त्‍यांनी बिभत्‍स चाळे केले. या काही तृतीयपंथीयांमुळे पोलीस आयुक्‍तांनी सरसकट सर्वच तृतीयपंथीयांच्या सार्वजनिक ठिकाणी भीक मागण्याच्या कृतीवर बंदी घातली आहे. त्‍यामुळे काही कृत्‍याची शिक्षा सर्वच तृतीयपंथीयांना झाली आहे. त्‍यामुळे शहरातील तृतीयपंथी आक्रोश करत आहेत.