ठाकरेंची साथ सोडून आलेल्या तनवाणी, घोडेले, तुपेंना अखेर मिळाली पदे!; माने, पाटलांनाही सोपवली जबाबदारी!!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : उद्धव ठाकरे यांची साथ सोडून शिंदे गटात दाखल झालेल्या पदाधिकाऱ्यांना कोणती जबाबदारी देण्यात येणार, याबद्दल चर्चा सुरू होती. ही चर्चा आज संपुष्टात आली. शिंदे गटाने त्यांना पक्षसंघटनाची जबाबदारी दिली आहे. यात माजी आमदार किशनचंद तनवाणी यांना छत्रपती संभाजीनगरचे प्रभारी लोकसभा मतदारसंघ प्रमुख करण्यात आले आहे.

माजी आमदार अण्णासाहेब माने यांना वैजापूर विधानसभा मतदारसंघाचे प्रभारी सहसंपर्क प्रमुख करण्यात आले आहे. कैलास पाटील यांच्याकडे गंगापूर- खुलताबाद मतदारसंघाची प्रभारी सहसंपर्क प्रमुख म्हणून जबाबदारी दिली असून, त्र्यंबक तुपे यांना फुलंब्रीचे प्रभारी सहसंपर्कप्रमुख करण्यात आले आहे. तिघांनाही प्रभारी पदे दिल्याने पुढे पक्षात आणखी चांगले स्थान दिले जाईल, अशी चर्चा आहे.

मनपा निवडणुकीसाठी समन्वय समिती
दोन दिवसांपूर्वी उपमुख्यमंत्री एकनाथ शिंदे यांनी महापालिका निवडणुकीच्या दृष्टीने घेतलेल्या मेळाव्यात कार्यकर्त्यांना बळ दिले. त्यानंतर निवडणुकीची तयारी म्हणून आणखी एक पाऊल टाकले आहे. शिंदे गटाने महापालिका निवडणुकीसाठी समन्वय समिती स्थापन केली असून, यात मुख्य मार्गदर्शक म्हणून पालकमंत्री संजय शिरसाट, खासदार संदिपान भुमरे, आमदार प्रदीप जैस्वाल, मराठवाडा सचिव अशोक पटवर्धन यांचा समावेश आहे. तर समिती सदस्य म्हणून जिल्हाप्रमुख राजेंद्र जंजाळ, माजी आमदार किशनचंद तनवाणी, माजी महापौर विकास जैन व त्र्यंबक तुपे, नंदकुमार घोडेले, मराठवाडा निरीक्षक ऋषिकेश जैस्वाल यांचा समावेश आहे.