शिंदे गटाचे उमेदवार अब्‍दुल सत्तार ६ कोटी ८५ लाखांच्या मालमत्तेचे धनी; ६ गुन्हेही अंगावर

सिल्लोड (सीएससीएन वृत्तसेवा) : शिंदे गटाचे सिल्लोडचे उमेदवार अब्‍दुल सत्तार यांनी बुधवारी (२३ ऑक्‍टोबर) एक उमेदवारी अर्ज निवडणूक निर्णय अधिकाऱ्यांकडे दाखल केला. या अर्जासोबत त्‍यांनी स्वतःच्या मालमत्तेचा तपशील दिला असून, त्‍यानुसार त्‍यांच्याकडे एकूण ६ कोटी ८५ लाख २७ हजार ६०१ रुपयांची मालमत्ता असल्याचे नमूद केले आहे. बीए फर्स्ट इयरपर्यंत शिकलेल्या सत्तारांविरुद्ध एकूण ६ गुन्हे दाखल आहेत.

अशी आहे मालमत्ता…
-५ कोटी ४३ हजार ६५१ रुपयांची जंगम मालमत्ता. १ कोटी ८४ लाख ८३ हजार ९५० रुपयांची स्थावर मालमत्ता.
-सत्तार यांच्या पत्नीच्या नावे ३ कोटी ९७ लाख २९ हजार ९३६ रुपयांची जंगम मालमत्ता. ४० लाख ६ हजार ७४० रुपयांची स्थावर मालमत्ता.
-सत्तार यांच्याकडे ३ लाख २० हजार रुपयांची शासकीय देणी असून, ३९ लाख ४९ हजार ३० रुपयांचे बँकेकडून कर्ज घेतले आहे.
-विविध बँकांमध्ये ६२ लाख २९ हजार ५७० रुपयांच्या ठेवी.

-त्यांच्याकडे ५ लाख ९० हजार ४१६ रुपयांची रोख रक्कम.
-१५ तोळे सोने असून, ७ लाख ९१ हजार ५८३ रुपयांचे हिरे.
-महिंद्रा इंटरप्राइजेस कंपनीत १२ लाख ५० हजार रुपयांचे, तर विविध सहकारी संस्थांमध्ये २६ हजार ७०५ रुपयांचे, एएस अजंता कन्स्ट्रक्शनमध्ये २ कोटी ५५ लाख ९२ हजार ८०१ रुपयांचे शेअर्स आहेत.
-एक इनोव्हा कार आहे.
-२०२३-२४ चे एकूण उत्पन्न ९४ लाख ९५ हजार ४५६ रुपये.

यांचेही उमेदवारी अर्ज दाखल….
सिल्लोड : शिंदे गट -अब्‍दुल सत्तार, अपक्ष- रफीक खा मनवर खा पठाण व लक्ष्मण गणपत दांडगे.
छत्रपती संभाजीनगर पूर्व : अपक्ष -शेख खाजा किस्मतवाला कासीम, मो. इसाक मो. यासिन
गंगापूर : अपक्ष- शिवाजी खुबे, गोरख इंगळे

दोन दिवसांत ३४३ उमेदवारांनी अर्ज नेले…
९ मतदारसंघांतून दोन दिवसांत ३४३ उमेदवारांनी अर्ज नेले असून, यात भाजप, शिंदे गट, काँग्रेस, राष्ट्रवादी काँग्रेस, ठाकरे गटाच्या उमेदवारांसाठी घेतलेल्या अर्जांचा समावेश आहे.