विधानसभा निवडणूक : भाजपमधून आलेल्यांना ठाकरे गटाने पैसे घेऊन दिली तिकिटे!; आ. शिरसाट यांचा गंभीर आरोप

छत्रपती संभाजीनगर (सीएससीएन वृत्तसेवा) : ठाकरे गटाने भाजपमधून आलेल्या चौघांना पैसे घेऊन तिकिटे दिल्याचा गंभीर आरोप शिंदे गटाचे प्रवक्‍ते आ. संजय शिरसाट यांनी केला आहे. मोठा आर्थिक व्यवहार झाला असून, यात अंबादास दानवे आणि संजय राऊत यांचा सहभाग असल्याचे शिरसाट म्हणाले.

आ. सिरसाट यांनी शनिवारी (१९ ऑक्टोबर) पत्रकार परिषद घेऊन सांगितले, की ठाकरे गटात आता निष्ठावंतांना संधी नाही. भाजपमधून आलेल्यांनाच पैसे देऊन उमेदवारी दिली जात आहे. निष्ठावंतांनी केवळ झेंडे सांभाळावेत, असे ते म्‍हणाले. किशनचंद तनवाणी यांनी आ. शिरसाट यांना प्रत्‍युत्तर दिले. ते म्हणाले, की शिरसाट यांना तीन वेळा उमेदवारी दिली, त्या वेळी त्यांनीही पैसे दिले होते का? त्यांनी बोलताना भान ठेवले पाहिजे, असे तनवाणी म्हणाले. अंबादास दानवे म्हणाले, की ५० कोटींचे खोके घेतलेल्या लोकांबाबत काय बोलावे. गद्दारांनी गैरव्यवहार केल्यामुळे त्यांच्यावर बोलणे महत्त्वाचे नाही.

शिवसेनेच्या उद्धव गटाने छत्रपती संभाजीनगर पश्चिम मतदारसंघातून राजू शिंदे, वैजापूरमध्ये डॉ. दिनेश परदेशी, छत्रपती संभाजीनगर मध्य मतदारसंघात माजी महापौर किशनचंद तनवाणी आणि सिल्लोडमधून सुरेश बनकर यांची उमेदवारी निश्चित केली आहे. हे चौघेही भाजपातून आलेले आहेत. राजू शिंदे यांनी आ. शिरसाट यांच्यासमोर आव्हान निर्माण केले आहे. भाजपातून आलेल्यांना उमेदवारी दिल्याने निष्ठावंत सैनिकांत नाराजी आहे.