पोलीस पाटलांच्या मागण्यांबाबत सरकार सकारात्‍मक; मुख्यमंत्री एकनाथ शिंदे यांची छ. संभाजीनगरात ग्वाही

छत्रपती संभाजीनगर (सीएससीएन वृत्तसेवा) : पोलीस पाटील हा गाव पातळीवरील प्रशासनाचा महत्त्वाचा घटक असून शासनाचे नाक, कान आणि डोळे आहेत. गावातील सर्व घटकांमध्ये समन्वय राखण्याचे काम पोलीस पाटील करत असतात. त्यांच्या सर्व मागण्यांबाबत शासन सकारात्मक असून संवेदनशिलतेने निर्णय घेऊ, असे आश्वासन मुख्यमंत्री एकनाथ शिंदे यांनी रविवारी (६ ऑक्‍टोबर) पोलीस पाटील संघटनेच्या मेळाव्यात दिले.

महाराष्ट्र राज्य पोलीस पाटील असोसिएशनतर्फे राज्यस्तरीय आभार मेळावा व सत्कार समारंभ छत्रपती संभाजीनगरातील हर्सूल सावंगीतील समृद्धी लॉन्सवर झाला. यावेळी मुख्यमंत्री बोलत होते. पोलीस पाटीलांचे मानधन शासनाने १५ हजार रुपये केले. त्यामुळे मुख्यमंत्र्यांचे आभार पोलीस पाटील संघटनेने मानले. मेळाव्यास पालकमंत्री अब्दुल सत्तार, शहर व औद्योगिक विकास महामंडळाचे अध्यक्ष संजय शिरसाट, आ. प्रदीप जयस्वाल, आ. रमेश बोरनारे, विभागीय आयुक्त दिलीप गावडे, जिल्हाधिकारी दिलीप स्वामी, पोलीस पाटील संघटनेचे अध्यक्ष महादेव नागरगोजे आदींची प्रमुख उपस्थिती होती. पालकमंत्री अब्दुल सत्तार यांनीही आपले मनोगत व्यक्त केले. कारभारी पाटील यांनी आभार मानले.

घोषणाबाजीमुळे काही काळ गोंधळ…
बुलडाण्याचे पोलीस पाटील भारत शिंदे यांनी मुख्यमंत्री बोलत असताना चार महिन्यांपासून मानधन मिळाले नसल्याबद्दल घोषणा द्यायला सुरुवात केली. त्‍यामुळे काही गोंधळ उडाला. मुख्यमंत्र्यांनी तुमची समस्या सोडवू, असे आश्वासन दिले. कार्यक्रमानंतरही भारत शिंदे यांची एकनाथ शिंदे यांनी भेट वेतनाबद्दल आश्वस्त केले. दरम्‍यान, कार्यक्रमाला देवेंद्र फडणवीस येणार असल्याचे आधी सांगण्यात आले होते, मात्र व्यासपीठावर केवळ शिवसेनेचेच लोकप्रतिनिधी होते.