छत्रपती संभाजीनगर (सीएससीएन वृत्तसेवा) : छत्रपती संभाजीनगर पूर्व मतदारसंघात समाजवादी पार्टीचे डॉ. गफ्फार कादरी, छत्रपती संभाजीनगर मध्य मतदारसंघात ठाकरे गटाचे बंडू ओक, फुलंब्रीत शिंदे गटाचे जिल्हाप्रमुख रमेश पवार आणि वैजापूरमध्ये भाजपचे एकनाथ जाधव या बंडखोरांमुळे महायुती आणि महाविकास आघाडीचा ताप वाढला आहे. बंडखोर उमेदवार फारसे प्रभावशील नसले तरी मतविभाजनाचा फटका बसू शकतो. जिल्ह्यातील ९ विधानसभा मतदारसंघांतील लढतीचे चित्र सोमवारी (४ नोव्हेंबर) स्पष्ट झाले. एकूण २१४ उमेदवारांनी माघार घेतली असून, आता मैदानात १८३ उमेदवार शड्डू ठोकून आहेत.
उमेदवारी अर्ज मागे घेण्याची मुदत सोमवारी दुपारी तीनपर्यंत होती. छत्रपती संभाजीनगर पूर्व मतदारसंघात सर्वाधिक २९ उमेदवार रिंगणात असून, सर्वांत कमी १० उमेदवार वैजापूर मतदारसंघात लढणार आहेत. फुलंब्री मतदारसंघात ३८ जणांनी उमेदवारी अर्ज मागे घेतल्याने तिथे आता २७ उमेदवार मैदानात उरले आहेत. छत्रपती संभाजीनगर पूर्व मतदारसंघातून ठाकरे गटाचे राजू वैद्य, काँग्रेसचे मधुकर देशमुख, शरद्र पवार गटाचे पांडुरंग तांगडे, पश्चिममधून ठाकरे गटाचे बाळासाहेब गायकवाड, फुलंब्रीतून भाजपचे प्रदीप पाटील, शिंदे गटाचे किशोर बलांडे, जगन्नाथ काळे यांनी माघार घेतल्याचे प्रशासकीय सूत्रांनी सांगितले.
छत्रपती संभाजीनगर पूर्वमध्ये समाजवादी पार्टीचे डॉ. गफ्फार कादरी यांनी उमेदवारी कायम ठेवल्याने मुस्लिम मतांचे विभाजन होऊन एमआयएमचे उमेदवार इम्तियाज जलील यांची डोकेदुखी वाढली आहे, तर छत्रपती संभाजीनगर मध्य मतदारसंघात ठाकरे गटाचे बंडू ओक रिंगणात कायम असल्याने ठाकरे गटाचे उमेदवार बाळासाहेब थोरात आणि शिंदे गटाचे उमेदवार प्रदीप जैस्वाल यांच्यासमोर हिंदुत्ववादी मतांच्या विभाजनाचा धोका आहे. यापूर्वी ठाकरे गटाचे किशनचंद तनवाणी यांनी याच कारणावरून उमेदवारी मागे घेत असल्याची घोषणा केली होती. फुलंब्रीत भाजपच्या अनुराधा चव्हाण यांच्यासमोर बंडखोर रमेश पवार यांनी आव्हानच निर्माण केले आहे, तर वैजापूरमध्ये भाजपचे बंडखोर एकनाथ जाधव यांनी शिंदे गटाच्या रमेश बोरनारे यांच्यासमोर आव्हान निर्माण केले आहे.
.jpg)
