छत्रपती संभाजीनगर (सीएससीएन वृत्तसेवा) : एमआयएमचे कार्याध्यक्ष डॉ. अब्दुल गफ्फार कादरी यांनी प्रदेशाध्यक्ष इम्तियाज जलील यांच्यावर गंभीर आरोप करून पक्षाला सोडचिठ्ठी दिली आहे. खासदार असदुद्दीन ओवेसी यांच्याकडे राजीनामा पाठवल्यानंतर त्यांनी मंगळवारी (२२ ऑक्टोबर) सायंकाळी पत्रकार परिषद घेतली. उपमुख्यमंत्री देवेंद्र फडणवीस यांच्या इशाऱ्यावर जलील पक्ष चालवतात. ते चीटर आहेत. छत्रपती संभाजीनगर पूर्व मतदारसंघात अतुल सावे यांना निवडून आणण्यासाठी कमकुवत उमेदवार देण्यासाठी त्यांचा प्रयत्न सुरू आहे. जलील यांनी नांदेड लोकसभेची पोटनिवडणूक लढविण्यापेक्षा नागपुरात फडणवीस यांच्या विरोधात लढून दाखवावे, असे आव्हान डॉ. कादरी यांनी दिले. वंचित बहुजन आघाडीसोबतची युतीही जलील यांनीच तोडल्याचा आरोपही केला. दरम्यान, डॉ. कादरी यांच्या आरोपांबाबत जलील यांना पत्रकारांनी विचारले असता त्यांनी नो कमेंट्स एवढीच प्रतिक्रिया दिली.
पत्रकार परिषदेत डॉ. कादरी म्हणाले, की माझा राजीनामा ई-मेल, व्हॅट्स ॲपने पाठवला आहे. माझ्याविरोधात जलील यांनी पक्षप्रमुखांचे कान एवढे कान भरले की, ते एक मिनिटही माझ्याशी बोलायला तयार नाहीत. जलील यांनी माझ्याविरोधात कुटील डाव रचले. मी पक्ष सोडल्यानंतर राज्यातील अनेक पदाधिकारी राजीनामे देतील, असा दावाही त्यांनी केला. आजपर्यंत जलील यांनीच पक्षाला कमकुवत केल्याचे सांगत ते म्हणाले, की २०१९ मध्ये एमआयएम आणि वंचित बहुजन आघाडीची युती मी करवली.
जलील केवळ त्यांच्यामुळेच खासदार झाले. मात्र त्यानंतर त्यांच्यामुळेच वंचितसोबतची युती तुटली. ही युती राहिली असती तर राज्यात १५ ते २० आमदार निवडून आले असते. इम्तियाज यांना हे नको होते. त्यांना केवळ स्वतःलाच मोठे व्हावेसे वाटते. २०१९ मध्ये राज्यात अनेक जागांवर समाजवादी पक्षासोबत एमआयएमने युती केली. महाराष्ट्रातील काँग्रेस, राष्ट्रवादीच्या मोठ्या मुस्लीम नेत्यांच्या विरोधात उमेदवार उभे करून त्यांना पाडण्याचे काम जलील यांनी केले. अंबादास दानवे यांच्यावेळी विधान परिषद निवडणुकीतही जलील यांनी सौदेबाजी केली. मात्र नगरसेवकांना पैसे मिळाले नाहीत, असा गंभीर आरोपही त्यांनी केला.
काँग्रेसकडून इच्छुक…
छत्रपती संभाजीनगर पूर्व विधानसभा मतदारसंघातूनच मी यंदा निवडणूक लढविणार असून, काँग्रेस पक्षासोबत बोलणी सुरू आहे. मी दिल्लीला जाऊन आलो. दोन ते तीन दिवसात अंतिम निर्णय होईल, असा दावाही डॉ. कादरी यांनी केला. डॉ. कादरी यांनी यापूर्वी २०१४ आणि २०१९ मध्ये अतुल सावेंच्या विरोधात विधानसभा निवडणूक लढली. २०१४ मध्ये त्यांचा अवघ्या ४ हजार २६० मतांनी पराभव झाला होता. त्यानंतर २०१९ मध्ये ते १३ हजार ९३० मतांनी पराभूत झाले होते.
.jpg)
