छत्रपती संभाजीनगरमध्ये MIM कडून नासेर सिद्दीकींना उमेदवारी ; जैस्वाल, तनवाणींना आव्‍हान देणार

छत्रपती संभाजीनगर (सीएससीएन वृत्तसेवा) : छत्रपती संभाजीनगर मध्य मतदारसंघातून एमआयएमने नासेर सिद्दीकी यांना उमेदवारी जाहीर केली आहे. इम्तियाज जलील यांना उमेदवारी मिळेल, अशी आशा होती. मात्र जलील हे नांदेड लोकसभा पोटनिवडणूक लढण्याची शक्‍यता आहे. त्‍यामुळेच सिद्दीकी यांच्या गळ्यात उमेदवारीची माळ पुन्हा घालण्यात आली आहे.

शिवसेना शिंदे गटाचे आ. प्रदीप जैस्वाल, ठाकरे गटाचे किशनचंद तनवाणी यांच्याशी सिद्दीकी यांची सरळ लढत होऊन मध्य मतदारसंघात तिरंगी सामना रंगणार आहे. विशेष म्‍हणजे, एमआयएमचा याच मतदारसंघातून इम्‍तियाज जलील यांच्या रुपाने महाराष्ट्रातील पहिला आमदार निवडून आला होता. २०१४ मध्ये जलील निवडून आले होते. त्‍यानंतर त्‍यांनी खासदारकीही उपभोगली. मात्र यंदाच्या लोकसभा निवडणुकीत त्‍यांचा पराभव होऊन शिंदे गटाचे संदिपान भुमरे खासदार झाले. त्‍यामुळे ते पुन्हा एकदा मध्य मतदारसंघातून लढतील, अशी शक्‍यता होती.

मात्र नांदेड लोकसभेची पोटनिवडणूक लढण्याची तयारी त्‍यांनी केली असल्याचे दिसून येते. जलील यांनी छत्रपती संभाजीनगर पूर्व, मध्य आणि वैजापूर मतदारसंघातून उमेदवारी अर्ज खरेदी केले आहेत. मात्र विधानसभा निवडणूक लढण्याची त्‍यांची इच्‍छा दिसत नाही, असेच एकंदरीत चित्र आहे. नांदेड लोकसभा निवडणुकीसाठी त्‍यांनी व्यूहरचनाही केली असून, मराठा मतेही पदरात पाडण्यासाठी त्‍यांनी गेल्या काही दिवसांत मनोज जरांगे यांच्याही भेटीगाठी घेतल्या आहेत.

मराठा-मुस्लिम एकत्र आले तर नांदेडमध्ये यश मिळू शकते, असा कदाचित त्‍यांचा होरा असावा. मध्य मतदारसंघात सिद्दीकींच्या उमेदवारीमुळे या शक्‍यतेला आता बळ मिळाले आहे. २०१९ मध्येही नासेर सिद्दीकी यांनी मध्य मतदारसंघातून निवडणूक लढली होती. त्‍यावेळी त्‍यांनी दुसऱ्या क्रमांकाची मते घेतली होती. यंदाच्‍या निवडणुकीत शिंदे गट आणि ठाकरे गट यांच्यात हिंदुत्‍ववादी मतांचे विभाजन होऊन या मतदारसंघात एमआयएमचा झेंडा फडकायला सोपे होणार असल्याने सिद्दीकी यांच्या आशा वाढल्या आहेत.