गंगापूरमध्ये सतीश चव्हाण -प्रशांत बंब यांच्यात होणार घमासान!

छत्रपती संभाजीनगर (सीएससीएन वृत्तसेवा) : गंगापूरमध्ये अखेर सतीश चव्हाण यांना शरद पवार गटाकडून उमेदवारी मिळाली आहे. गेल्या काही दिवसांपासून ते शरद पवार गटाकडून उमेदवारी मिळण्याच्या प्रयत्‍नात होते. त्‍यासाठी त्‍यांनी शरद पवारांची भेटही घेतली होती. भाजपचे उमेदवार प्रशांत बंब यांच्याविरोधात अखेर त्‍यांना उमेदवारी मिळाली. आता गंगापूरमध्ये या दोन उमेदवारांत घमासान होणार आहे.

निवडणूक जाहीर होण्याआधीच दोघांत रंगलेल्या आरोप-प्रत्‍यारोपामुळे प्रत्‍यक्ष निवडणुकीत काय होईल, याचा अंदाज सर्वांना आला होता. महायुतीत हा मतदारसंघ अजित पवार गटाला सुटणार नाही, हे लक्षात येताच सतीश चव्हाण यांनी शरद पवारांच्या पक्षाकडे घरवापसीची वाटचाल सुरू केली होती. त्‍यामुळे अजित पवारांनी त्‍यांची पक्षातून काही दिवसांपूर्वी हकालपट्टी केली. त्‍यानंतर सतीश चव्हाण हे वेळप्रसंग अपक्ष मैदानात उतरतील, अशी चर्चा सुरू झाली होती. मात्र शरद पवारांनी स्थानिक विरोध डावलून सतीश चव्हाणांना पसंती दिली.

बंब आणि चव्हाण यांच्यातील शीतयुद्ध गेल्या काही काळापासून सुरू आहे. विशेषतः बंब यांनी शिक्षकांच्या कामचुकारपणाबद्दल आवाज उठवल्यानंतर शिक्षकांची बाजू घेऊन चव्हाण बंब यांना विरोध करायला लागले होते. मात्र महायुतीत असल्याने त्‍यांची गोची होत होती. महायुतीत असूनही दोघांतील आरोप-प्रत्‍यारोप गाजले होते.

मनसेकडून फुलंब्रीत बाळासाहेब पाथ्रीकर
मनसे प्रमुख राज ठाकरे यांनी जाहीर केलेल्या पाचव्या यादीत फुलंब्री मतदारसंघातून बाळासाहेब पाथ्रीकर यांना उमेदवारी दिली आहे.

रासपचे जिल्ह्यातील उमेदवार
राष्ट्रीय समाज पक्षाचे प्रमुख महादेव जानकर यांनी जिल्ह्यातील पैठणमध्ये प्रकाश दिलवाले, वैजापूरमधून बाबासाहेब राशीनकर यांना उमेदवारी दिली आहे.