उद्धव ठाकरेंबद्दल एक शब्दही कोणी आणखी काढला तर या खोलीबाहेर कोणीच जाणार नाही… पप्पू व्यास यांनी ठणकावताच सन्नाटा!, किशनचंद तनवाणींच्या सत्‍कार सोहळ्यात घडला धक्कादायक प्रकार

छत्रपती संभाजीनगर (सीएससीएन वृत्तसेवा) : छत्रपती संभाजीनगर मध्य मतदारसंघाचे शिंदे गटाचे उमेदवार प्रदीप जैस्वाल यांच्या विरोधातील उमेदवारी मागे घेतल्याबद्दल किशनचंद तनवाणी यांचा हिंदुत्‍ववादी संघटनांनी सत्‍कार केला. यावेळी उद्धव ठाकरेंवर टीकाटिपण्णी सुरू होताच जुने शिवसैनिक असलेले पप्पू व्यास खवळले. उद्धव ठाकरे यांच्याबद्दल एक शब्दही कोणी आणखी काढला तर या खोलीबाहेर कोणीच जाणार नाही, असा इशारा त्यांनी देताच या ठिकाणी अक्षरशः सन्नाटा पसरला… व्यास यांचा रौद्रावतार पाहून पुढे कुणी काही बोललेच नाही…

नक्की काय घडले?
मध्य मतदारसंघात शिंदे गटाने विद्यमान आमदार प्रदीप जैस्वाल यांना उमेदवारी दिली आहे. त्‍यांच्याविरुद्ध ठाकरे गटाने किशनचंद तनवाणी यांना उमेदवारी दिली होती. मात्र यामुळे हिंदुत्‍ववादी मतांचे विभाजन होऊन ही बाब एमआयएम उमेदवार नासेर सिद्दीकी यांच्या पथ्यावर पडली असती. त्‍यामुळे तनवाणी यांनी माघार घेतली. परिणाम ऐनवेळी ठाकरे गटाला दुसरा उमेदवार उभा करावा लागला आहे. राजकीय भवितव्याची कोणतीही पर्वा न करता तनवाणी यांनी घेतलेल्या निर्णयाबद्दल गुरुवारी (३१ ऑक्‍टोबर) सकाळी त्यांच्या कार्यालयात हिंदुत्ववादी संघटनांनी सत्कार सोहळा ठेवला होता.

या छोटेखानी सोहळ्यात पदाधिकाऱ्यांची भाषणे झाली. महाविकास आघाडीचे सरकार असताना हिंदूंना कशाप्रकारे त्रास होता याची उदाहरणे देण्यात आली. काहींनी थेट उद्धव ठाकरे यांच्यावर टीकास्‍त्र सोडले. त्‍यामुळे जुने शिवसैनिक पप्पू व्यास व्यथीत झाले. अचानक ते जागेवर उठले आणि उद्धव ठाकरेंवर टीका करणाऱ्यांना सुनवायला सुरुवात केली. उद्धव ठाकरे यांच्याबद्दल एक शब्दही कोणी आणखी काढला तर या खोलीबाहेर कोणीच जाणार नाही, असा दम त्‍यांनी भरताच सारेच गर्भगळीत झाले. कार्यालयात शांतता पसरल्याचे सूत्रांनी सांगितले. एकूणच उद्धव ठाकरे यांनी काँग्रेस-शरद पवारांशी घरोबा केल्यामुळे मनात एकीकडे नाराजी, तर दुसरीकडे बाळासाहेब ठाकरे यांचे कुटुंबीय म्‍हणून जुन्या शिवसैनिकांत जिव्हाळा कायम असल्याचे दिसून आले.