छत्रपती संभाजीनगर (सीएससीएन वृत्तसेवा) : शिवसेना ठाकरे गटाचे पक्षप्रमुख उद्धव ठाकरे हे छत्रपती संभाजीनगरमध्ये ७ जुलैला शिव संकल्प मेळावा घेणार आहेत. सूर्या लॉन्सवर सकाळी ११ ला हा मेळावा होईल. शेतकऱ्यांना न्याय देणार, गद्दारांचा कडेलोट करणार अशी घोषणा मेळाव्यासाठी देण्यात आली आहे. उद्धव ठाकरेंकडून उरलेला पक्षतरी एकसंघ राहील, यासाठी प्रयत्न सुरू असताना दुसरीकडे छत्रपती संभाजीनगरात मात्र गटबाजीचे जणू पेव फुटले आहे.
विरोधी पक्ष नेते आ. अंबादास दानवे यांनी आज, ३० जूनला उद्धव ठाकरे यांच्या मेळाव्याच्या नियोजनासाठी बैठक बोलावली होती. मात्र या बैठकीला माजी खासदार चंद्रकांत खैरे, माजी महापौर नंदकुमार घोडेले यांना निमंत्रण नव्हते. खैरेंना मानणारे पदाधिकारी, कार्यकर्ते या बैठकीपासून दूर ठेवल्याने नक्की पक्षात सुरू काय आहे, असा प्रश्न सामान्य शिवसैनिकांना पडला आहे.
लोकसभा निवडणुकीतील यशानंतर विधानसभा निवडणुकीच्या तयारीला उद्धव ठाकरे लागले आहेत. उद्धव ठाकरे लवकरच महाराष्ट्र दौरा करणार आहेत. उद्धव ठाकरे छत्रपती संभाजीनगरात मेळावा घेणार असल्याचे मेळाव्याचे फ्लेक्स ठिकठिकाणी शहरात लागले आहेत. दुसरीकडे पक्षाला मात्र गटबाजीने ग्रासल्याचे चित्र रविवारी दिसून आले. आ. दानवे यांच्या कार्यालयात झालेल्या नियोजन बैठकीला जिल्हाप्रमुख किशनचंद तनवाणी, आमदार उदयसिंह राजपूत, शहरप्रमुख विजय वाघचौरे हेही नव्हते.
तनवाणींनी नेहमीप्रमाणे प्रकृती अस्वास्थाचे कारण दिलेले होते. आ. उदयसिंह राजपूत यांनी नियोजित कार्यक्रमांचे कारण दिले तर वाघचौरे हे बाहेरगावी आल्याचे छत्रपती संभाजीनगर सिटी न्यूजला कळले. पत्रकारांनी चंद्रकांत खैरे यांना विचारणा केली असता त्यांनी निमंत्रण नसल्याचे सांगितले. मराठवाडा विभागीय सचिव अशोक पटवर्धन, सहसंपर्कप्रमुख त्र्यंबक तुपे, विजयराव साळवे,जिल्हाप्रमुख राजेंद्र राठोड, महानगरप्रमुख राजू वैद्य व महिला आघाडी संपर्कसंघटिका सुनिता आऊलवार उपस्थित होते.
.jpg)
.jpg)
.jpg)
