मृताच्या टाळूवरचे लोणी खाणारा हा महाभाग नक्की आहे कोण?, नगरपरिषद म्‍हणते आमचे लोक नाहीत, मग हा भाई अवतरला कुठून?, पैठणमध्ये जनभावना संतप्त

पैठण (सीएससीएन वृत्तसेवा) : पैठण येथील गोदावरी नदीकाठावरील मोक्ष घाटाच्या गेटवरच दशक्रिया विधीसाठी येणाऱ्या नातेवाइकांकडून अनधिकृतपणे चक्क १०० रुपयांची वसुली केली जात आहे. गोदावरी स्वच्छतेच्या नावाखाली ही पावती फाडली जात आहे. मात्र स्वच्छतेसाठी नगरपरिषदेचे कर्मचारी आहेत, मग हे लोक कोण आहेत जे वसुली करत आहेत आणि कशासाठी करत आहेत, असा प्रश्न निर्माण झाला आहे. कुणीतरी भाई आहे, जो भाईगिरी करून अशाप्रकारे ‘खंडणी’ तीही मृतांच्या टाळूवरचे लोणी खाऊन करत असल्याने पैठणमध्ये जनभावना संतप्त झाल्या आहेत.

नगरपरिषदेने अशाप्रकारे वसुली करण्याची परवानगी कुणालाही दिलेली नाही. याचे स्‍पष्टीकरण खुद्द मुख्याधिकाऱ्यांनी दिले आहे. वसुलीवाले मात्र स्पष्टच सांगतात, की आम्हाला कुणाच्या परवानगीची गरज नाही. त्यांना तुम्ही कुणाच्या माध्यमातून व कधी स्वच्छता करता हे विचारल्यावर ते म्हणतात, काम चालूच आहे. नगर परिषदेकडून मोक्षघाटाच्या स्वच्छतेसाठी कोणतीही वसुली होती. त्यांनी स्वच्छता कर्मचारीही नियुक्त केले आहेत आणि ते स्वच्छताही करतात. मग ही वसुली कशासाठी, असा प्रश्न सर्वांना पडला आहे. स्वच्छतेच्या नावाखाली पावती कोणत्या आधारे आणि कोणाच्या सांगण्यावरून दिली जात आहे, असा सवाल तर या प्रकाराची चौकशी करण्याची मागणी माजी आमदार संजय वाघचौरे यांनी केली आहे.

लुटीची जणू परंपराच…
मोक्षघाटावर आधीच या ना त्‍या कारणावरून दशक्रिया विधीसाठी येणाऱ्यांकडून पैसे केले जातात. यात नगर परिषद पार्किंगसाठी लहान गाड्यांकडून २० रुपये तर मोठ्या गाड्यांकडून ३० रुपये घेते. परिसरात अवैध पार्किंगच्या नावाखाली शुल्‍क वसुलीही जोरात सुरू असते. त्‍यात आता गोदावरी नदीच्या स्वच्छतेच्या नावाखाली नगर जिल्ह्यातील एका भाईने ही भाईगिरी सुरू केली आहे. त्‍यामुळे लोक संतप्त झाले आहेत.

नगर परिषद काय म्हणते…
नगर परिषद मुख्याधिकारी संतोष आगळे म्हणाले, की स्वच्छतेच्या नावाखाली कोण पैसे वसुली करत आहे, याची माहिती घेऊन तो प्रकार तातडीने थांबविण्यात येईल. मात्र आजवर झालेल्या वसुलीच्या रकमेचे काय, हा प्रश्न अनुत्तरीतच राहणार आहे. तूर्त हा मृताच्या टाळूवरचा लोणी खाण्याचा प्रकार बंद झाला तरी पुरेसे…