२ लाखांसाठी इतके छळले, की २२ वर्षांच्या राधाने शेततळ्यात उडी घेऊन केली आत्‍महत्‍या, पैठण तालुक्‍यातील खळबळजनक घटना

पैठण (मेट्रोपोलिस पोस्ट वृत्तपत्राच्या सौजन्याने) : माहेरी कमालीची गरिबी. पण अवघ्या दोन लाखांसाठी सासरच्यांनी तीन वर्षांपासून अतोनात छळ मांडला. अखेर सहनशक्ती संपल्याने राधा संतोष शेळके या २२ वर्षीय तरुणीने शेततळ्यात उडी मारून जीव दिला. पैठण तालुक्यातील नांदर येथे सोमवारी (६ ऑक्‍टोबर) दुपारी ३ वाजता ही दुर्दैवी घटना घडली.

राधाचा (रा. सुंदरवाडी, झाल्टा फाटा, छत्रपती संभाजीनगर) विवाह नांदर येथील संतोष शेळके याच्यासोबत झाला होता. त्यांना एक मुलगा व एक मुलगी अशी जुळी मुलेही आहेत. लग्नानंतर लगेच तिच्या सासरच्यांनी घर बांधणीसाठी २ लाख रुपये माहेरहून आणावेत यासाठी शारीरिक व मानसिक छळ सुरू केला. दीर राजेंद्र, सासू कलाबाई, जाऊ निकिता, नणंद जनाबाई अमोल रोठे (रा. नारायणगाव, जि. बीड) ही सातत्याने राधाला छळत होते. त्याला कंटाळून अखेर सोमवारी राधाने गावातील शेततळ्यात उडी घेत जीव दिला.

पोलीस बंदोबस्तात अंत्यसंस्कार
घटनेची माहिती मिळाल्यानंतर राधाच्या माहेरच्यांनी तिचा मृतदेह पैठणच्या शासकीय रुग्णालयात नेला. तेथे माहेरच्यांनी आरोपींच्या अटकेपर्यंत शवविच्छेदन आणि अंत्यसंस्कार न होऊ देण्याची भूमिका घेतली. यामुळे तनावाची परिस्थिती निर्माण झाली होती. अखेर पाचोड पोलीस ठाण्याचे फौजदार गोविंद राऊत यांनी गुन्हा दाखल करण्याचे आश्वासन दिल्यावर नातेवाइकांनी शवविच्छेदनास परवानगी दिली. यानंतर राधाचा मृतदेह अंत्यसंस्कारासाठी नांदर येथे नेण्यात आला. मात्र, तेथेही नातेवाइकांनी आरोपींच्या अटकेची मागणी करीत अंत्यसंस्कार रोखले. अखेर पोलिसांनी समजूत काढल्यावर राधावर अंत्यसंस्कार करण्यात आले.