मंगेश साबळे यांच्यानंतर आता वैजापूरमध्ये अजय साळुंके यांचे उपोषण सुरू, प्रशासनाचा ताप पुन्हा वाढला..!

वैजापूर (मेट्रोपोलिस वृत्तपत्राच्या सौजन्याने) : गेवराई पायगा (ता. फुलंब्री) येथील सरपंच मंगेश साबळे यांचे बेमुदत उपोषण प्रशासन आणि सरकारविरोधात संतप्त लाट निर्माण करत असताना, ते कसे बसे सरकारकडून आलेले प्रतिनिधी मंत्री अतुल सावे यांनी सोडवले. सिल्लोडमधील हे आंदोलन संपत नाही तोच कालपासून (७ ऑक्‍टोबर) शेतकरी शेते तथा जनक्रांती सेनेचे संस्थापक अजय साळुंके यांनी शेतकऱ्यांच्या मागण्या घेऊन वैजापूर तालुक्यातील टुनकी येथे बेमुदत उपोषण सुरू केले आहे. त्‍यामुळे प्रशासनाचा ताप पुन्हा वाढला आहे.

सध्या पंचनाम्यांच्या नावाखाली प्रशासन, सरकारकडून वेळकाढूपणा सुरू आहे. मदतीची घोषणा झाली, पण मदत शेतकऱ्यांच्या खात्यावर जमा होईल, तेव्हाच शेतकऱ्यांची चिंता संपणार आहे. सध्या सरकार आणि प्रशासन करत असलेल्या वेळकाढूपणामुळे शेतकऱ्यांवरील संकट दिवसेंदिवस गडद होत चालले आहे. त्यामुळे जुने कर्ज माफ करून शेतकऱ्यांना वाचवा, त्यांच्या शेतमालाला योग्य भाव मिळावा यासह विविध मागण्या घेऊन अजय साळुंके उपोषणाला बसले.

साळुंके म्हणाले, की निसर्गाच्या लहरीपणामुळे शेतकरी संकटात सापडला असून, उत्पादन खर्चातील वाढ, बाजारभावातील अस्थिरता यामुळे त्यांची परिस्थिती ढासळत आहे. संकटात सापडलेल्या या शेतकऱ्यांना सरकारने आर्थिक मदत करावी, शेतकऱ्यांचे जुने कर्ज माफ करावे, त्यांच्या शेतमालाला योग्य भाव मिळावा, अशी मागणी त्यांनी केली. गाव व परिसरातील असंख्य शेतकऱ्यांसह स्थानिक लोकप्रतिनिधी, सामाजिक कार्यकर्ते, विविध संघटनांच्या पदाधिकाऱ्यांनी साळुंके यांच्या उपोषणाला पाठिंबा दिला आहे. मंगळवारी उपोषणस्थळी उपस्थित शेतकऱ्यांनी शेतकरी वाचवा, देश वाचवा, कर्जमाफी मिळाल्याशिवाय माघार नाही, असे फलक झळकवून साळुंके यांचा उत्साह वाढवला.