मासेमारीसाठी गेलेल्या २२ वर्षीय तरुणाचा तलावात बुडून मृत्‍यू, दौलताबादजवळील घटना

By City News Desk

On 09 Oct 2025

मासेमारीसाठी गेलेल्या २२ वर्षीय तरुणाचा तलावात बुडून मृत्‍यू, दौलताबादजवळील घटना

"छत्रपती संभाजीनगर सिटी न्यूज' वेबसाईटवर प्रसिद्ध होणारा मजकूर, छायाचित्रे 'मेट्रोपोलिस पोस्ट' वृत्तपत्राच्या परवानगीशिवाय पूर्णतः किंवा अंशतः कॉपी करण्यास सक्त मनाई आहे. असे करताना कुणीही आढळल्यास कोणतीही वेगळी नोटीस न देता कायदेशीर कारवाई केली जाईल याची नोंद घ्यावी. - संपादक, मेट्रोपोलिस पोस्ट वृत्तपत्र

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : दौलताबाद पोलीस ठाण्याच्या हद्दीत येणाऱ्या आसेगाव (ता. खुलताबाद) येथे मासेमारीसाठी गेलेल्या २२ वर्षीय युवकाचा तलावात बुडून मृत्यू झाला आहे. विशाल मच्छिंद्र माळी असे या तरुणाचे नाव असून, बुधवारी (८ ऑक्‍टोबर) सकाळी ११ ला ही घटना समोर आली.

विशाल बुधवारी सकाळी ८ च्या सुमारास नेहमीप्रमाणे मासेमारीसाठी गावाच्या बाजूला असलेल्या तलावावर गेला होता. बराच वेळ तो घरी न परतल्याने वडील विशालला बोलावण्यासाठी तलावाकडे गेले. मात्र त्याची चप्पल, कपडे, मोबाईल तलावाच्या काठावर दिसले. तब्बल दोन ते तीन तास वडिलांनी अन्य गावकऱ्यांच्या मदतीने तलाव परिसरासह प्रत्यक्षात तलावातही विशालचा शोध घेतला. मात्र, त्याचा शोध लागला नाही. अखेर पोलीस पाटील बाळू कांबळे यांनी दौलताबाद पोलिसांना कळवले.

पोलिसांनी अग्निशमन दलाला माहिती देत विशालचा शोध घेण्याची विनंती केली. यानुसार अशोक खांडेकर, विजय राठोड, दीपक गंगावणे, संग्राम मोरे, दिनेश मुंगसे, छत्रपती कोकणे, अजिंक्य भगत, प्रणाली सूर्यवंशी, चंद्रसिंह गीते या अग्निशमन दलाच्या जवानांनी तब्बल दोन तास तलावात विशालचा शोध घेतला. अखेर सायंकाळी ५ वाजता विशालचा मृतदेह तलावातून बाहेर काढण्यात आला. या प्रकरणी दौलताबाद पोलीस ठाण्यात अकस्मात मृत्यूची नोंद करण्यात आली आहे.