छत्रपती संभाजीनगर (सीएससीएन वृत्तसेवा) : बहिणीच्या लग्नासाठी सावकार महिलेकडून व्याजाने घेतलेली ५ लाखांची रक्कम दुप्पट झाली. ती देऊनही मात्र सावकार महिलेने शेतजमीन परत नावावर करून देण्यास नकार दिला. उलट आणखी पैसे मागितले. त्यामुळे नैराश्य आलेल्या २९ वर्षीय शेतकऱ्याने शेतात विष पिऊन आत्महत्या केल्याची धक्कादायक घटना छत्रपती संभाजीनगर तालुक्यातील आडगाव खुर्द येथे समोर आली आहे. या प्रकरणात गुरुवारी (२४ ऑक्टोबर) शेतकऱ्याच्या भावाने करमाड पोलीस ठाण्यात दिलेल्या तक्रारीवरून पोलिसांनी सावकार महिला आणि तिच्या साथीदाराविरुद्ध गुन्हा दाखल केला आहे. या घटनेमुळे जिल्ह्यात खळबळ उडाली आहे.
या प्रकरणात ज्ञानेश्वर श्रीमंत ठोंबरे (वय २५, रा. आडगाव खुर्द ता. जि. छत्रपती संभाजीनगर) यांनी या प्रकरणात तक्रार दिली आहे. ते इंदौर येथे अनुराधा सिड्स कंपनीमध्ये नोकरीला आहेत. त्यांना एक बहीण राधा आहे व भाऊ गणेश श्रीमंत ठोंबरे (वय २९) होता. तो गावाकडे शेती व्यवसाय करायचा तसेच पानटपरी चालवायचा. त्यांना आडगाव खुर्द शिवारात पाच एकर जमीन आहे. सन २०१६ मध्ये राधाचे लग्न झाले. तिच्या लग्नासाठी गणेशने संगीता शिवाजी दांडगे (रा. वरुड काजी ता. छत्रपती संभाजीनगर) व तिचा व्यवहार पाहणारा सुरेश इत्थर (रा. लाडगाव) यांच्याकडून ५ लाख रुपये व्याजाने घेतले होते. त्यासाठी गणेश व त्याच्या वडिलांनी संगीता दांडगे हिच्या नावे ४१ आर जमीन खरेदीखत करून दिली होती.
पैसे परत केल्यानंतर पुन्हा जमीन नावे करून देण्याचे ठरले होते. एक वर्षानंतर पाच लाख रुपये रकमेचे ५ टक्के व्याजदराने ३ लाख रुपये झाले होते. ठोंबरे कुटुंबांकडून पैशाची व्यवस्था न झाल्यामुळे संगीता दांडगे व तिचा व्यवहार पाहणारा सुरेश इत्थर यांनी ५ लाख रुपये मुद्दलमध्ये ५ लाख रुपये समाविष्ट केले. त्यानंतर पैसे घेतल्यापासून अंदाजे १८ महिन्यानंतर व्यवहार केला असता त्यांनी ठोंबरे कुटुंबाकडे मुद्दल ८ लाख रुपये झाल्याचे सांगून त्याचे व्याजासहीत १० लाख ३० हजार रुपये झाल्याचे सांगितले.
रक्कम वाढत असल्यामुळे ठोंबरे कुटुंबाने अर्धा एकर जमीन विकून तसेच नातेवाइकांकडून हातउसने स्वरुपात पैसे घेऊन पैशाची व्यवस्था करून त्यांना मुद्दल व व्याज मिळून ९ लाख ७० हजार रुपये परत केले. या व्यवहारातील ६० हजार रुपयेच बाकी राहिलेले होते. त्यामुळे दिलेल्या पैशांमध्ये व्यवहार मिटवून टाका, अशी विनंती ठोंबरे कुटुंबाने केली होती. संगिता व तिच्या साथीदाराने व्यवहार न मिटविता ६० हजार रुपये शिल्लक राहिल्याचे सांगून त्या पैशांना चक्रीव्याज लावून ठोंबरे कुटुंबाकडे १ लाख ४० हजार रुपये व्याज काढले व पैसे देण्याबाबत तगादा लावला. त्यामुळे ठोंबरे कुटुंबाने पुन्हा त्यांना दोन वर्षांनंतर १ लाख ४० हजार रुपये रोख दिले. ती रक्कम देतेवेळी त्यांचा चुलत भाऊ विजय कुंडलीक ठोबरे हेही साक्षीदार होते. त्यानंतर ठोंबरे कुटुंबाने आमची जमीन परत करण्याची विनंती संगिता आणि तिच्या साथीदाराला केली. मात्र त्यांनी जमीन परत केली नाही. त्यामुळे ठोंबरे कुटुंब चिंतित झाले होते. गणेश याने खूप टेन्शन घेतले होते.
ज्ञानेश्वर नोकरीनिमित्त इंदौर येथे असताना १५ दिवसांपूर्वी गणेशने त्याला कॉल करून सांगितले होते, की मला सुरेश इत्थर भेटला होता. तो म्हणाला की, तू मला आणखी २ लाख रुपये दिले तर मी तुमची जमीन तुम्हाला परत करायला सांगतो. नसता तुम्ही कुठेही गेले आणी काहीही केले तरी आम्ही तुम्हाला तुमची जमीन करून देत नाही, अशा धमक्या देत असल्याबाबत गणेशने ज्ञानेश्वरला सांगितले होते.
२२ ऑक्टोबरला गणेशने पत्नीच्या मोबाइलवरून ज्ञानेश्वरला दोन- तीन वेळा कॉल केला.
मात्र ज्ञानेश्वरने कामात असल्याने त्याला नंतर बोलतो असे म्हणून फोन कट केला होता. त्यानंतर त्यांचा चुलत भाऊ विजय कुंडलीक ठोंबरे यांनी ज्ञानेश्वरला फोन करून सांगितले की, गणेश याने औषध घेतले आहे. त्याला आम्ही घाटी रुग्णालयात आणले आहे. त्यामुळे ज्ञानेश्वर लगेचच इंदौरवरून छत्रपती संभाजीनगरला आला. २३ ऑक्टोबरला सकाळी ७ वाजता ज्ञानेश्वरला कळले, की २२ ऑक्टोबरला दुपारी साडेतीनच्या सुमारास गणेशने शेतात पिकावर फवारणी करण्याचे विषारी औषध पिले. त्या ठिकाणी त्याचा शर्ट लटकविलेला होता. पोलिसांनी घटनास्थळाचा पंचनामा केला तेव्हा त्याच्या शर्टच्या खिशामध्ये एक हस्तलिखीत चिठ्ठी मिळून आली. ती चिठ्ठी पोलिसांनी जप्त केली असल्याचे कळले. गणेशचा उपचारादरम्यान मृत्यू झाल्यानंतर गावात अंत्यविधी करण्यात आले.
चिठ्ठीत लिहिले होते…
“आत्महत्या करण्यास कारण सावकारकी संगीता शिवाजी दांडगे वरुड काजी सुरेश इथ्थर लाडगाव यांनी माझ्याकडून 9,70,000 रुपये घेऊन परत 1,40,000 रुपये, माझ्याकडून सुरेश इथ्थरने 1,90,000 रुपये घेतले आणि माझी जमीन काही माझ्या नावे करत नाही, हे दोघे माझ्या मृत्यूस कारणीभूत आहे, दुसरे कुणीही नाही. असा मजकूर लिहिलेला व खालच्या बाजूस गणेश याची स्वाक्षरी आहे.
ज्ञानेश्वरने दिली तक्रार…
गणेशने मृत्यूपूर्वी लिहिलेली चिठ्ठी वाचल्यानंतर संगीता शिवाजी दांडगे रा. वरुड काजी ता. छ. संभाजीनगर व तिचा व्यवहार बघणारा सुरेश इत्थर रा. लाडगाव ता. छत्रपती संभाजीनगर यांच्यामुळेच गणेशने आत्महत्या केल्याचे समोर आल्याने ज्ञानेश्वरने करमाड पोलीस ठाण्यात धाव घेऊन तक्रार दिली. त्यावरून पोलिसांनी संगीता शिवाजी दांडगे व सुरेश इत्थर या दोघांविरुद्ध गुन्हा दाखल केला आहे. अधिक तपास पोलीस उपनिरीक्षक भारत निकाळजे करत आहेत.
.jpg)
