वैजापूर (सीएससीएन वृत्तसेवा) : विरुद्ध दिशेने भरधाव आलेल्या आयशर ट्रकने कारला समोरून धडक दिली. यात कारमधील सासरे-जावयाचा जागीच मृत्यू झाला, तर दोघे गंभीर जखमी झाले. हा भीषण अपघात समृद्धी महामार्गावर वैजापूरजवळ सोमवारी (११ नोव्हेंबर) पहाटे साडेतीनच्या सुमारास घडला.
रामचंद्र चंदुमल मेठाणी (वय ५५, रा. अमरावती) व नामदेव ढालुमल पोपटाणी (वय ३८, रा. नंदूरबार) अशी मृत्यू झालेल्यांची नावे आहेत. रमण गुरुमुखदास टेकवाणी (वय ३७) व दीपक ठाकरदास मेठाणी (वय ३०) गंभीर जखमी झाले आहेत. रामचंद्र मेठाणी यांच्या भावजयीचे १२ दिवसांपूर्वी निधन झाले. रामचंद्र हे जावई, पुतणे रमण व दीपक यांच्यासह कारने नाशिक येथे अस्थिविसर्जनासाठी कारने (क्र. एमएच २७, डीसी ७७१३) निघाले होते.
समृद्धी महामार्गाने जात असताना वैजापूरहद्दीत चॅनल क्रमांक ४९० जवळ समोरून विरुद्ध दिशेने भरधाव आलेल्या ट्रकने (डीडी ०१ एन ९२७५) त्यांच्या कारला जोरात धडक दिली. यात रामचंद्र व नामदेव हे सासरे-जावई जागीच ठार झाले, तर रमन व दीपक गंभीर जखमी झाले. अपघातानंतर ट्रकचालक पसार झाला असून पोलीस त्याचा शोध घेत आहेत. नागरिक व पोलिसांनी मदतकार्य करत जखमींना वैजापूर येथील उपजिल्हा रुग्णालयात आणले. नंतर जखमींना अमरावती येथे हलविण्यात आले. याप्रकरणी रामचंद्र यांचा मुलगा जयकुमार मेठाणी यांच्या फिर्यादीवरून ट्रकचालकाविरुद्ध वैजापूर पोलिसांनी गुन्हा दाखल केला आहे. अधिक तपास पोलीस उपनिरीक्षक प्रवीण पाटील करत आहेत.
.jpg)
