मामानेच अल्पवयीन भाचीला नेले पळवून, वैजापूरमध्ये खळबळ!

वैजापूर (सीएससीएन वृत्तसेवा) : मामानेच १२ वर्षीय भाचीला रात्रीतून पळवून नेल्याची धक्कादायक घटना वैजापूर तालुक्‍यातील सुराळा येथे शनिवारी (३१ ऑगस्ट) समोर आली. मुलीच्या आईने वैजापूर पोलीस ठाण्यात त्यांच्या मुलीला त्यांच्या भावानेच पळवून नेल्याची तक्रार केली आहे.

मूळचे कोपरगाव तालुक्‍यातील उक्‍कडगावचे कुटुंब सुराळा शिवारात शेती बटाईने करतात. याच शेतात राहतात. तक्रारदार ३० वर्षीय महिलेचा लहान भाऊही त्‍यांच्याकडे मोलमजुरीसाठी दोन महिन्यांपूर्वी आला होता. ३० ऑगस्टला रात्री दहाला सर्व जण जेवण करून झोपी गेले. ३१ ऑगस्टला पहाटे दोनला (मध्यरात्री) लहानी मुलगी झोपेतून उठली असता तिला मोठी बहीण दिसली नाही. तिने आईला झोपेतून उठवून ही बाब सांगितली. त्यांनी पाहिले असता १२ वर्षीय मुलगी घरात नव्हती. तिचा मामाही नव्हता. शेजाऱ्याच्या शेतकऱ्याची मोटारसायकल घेऊन त्याने मुलीला पळवल्याचे समोर आले. पोलिसांनी मामाविरुद्ध गुन्हा दाखल केला आहे. मुलगी सातवीत शिकत होती. अधिक तपास पोलीस उपनिरीक्षक प्रवीण पाटील करत आहेत.

डोनवाड्यातूनही ११ वीत शिकणाऱ्या मुलीला फूस लावून पळवले…
डोनवाडा (ता. छत्रपती संभाजीनगर) येथूनही साडेपंधरा वर्षीय मुलीला फूस लावून पळविण्यात आल्याची घटना शनिवारी (३१ ऑगस्ट) समोर आली आहे. या प्रकरणात मुलीच्या ४४ वर्षीय आईने फुलंब्री पोलीस ठाण्यात तक्रार दिली. घटना २९ ऑगस्टच्या सकाळची आहे. मुलगी वडिलांचा डबा शेतात घेऊन जाते असे म्‍हणून डबा घेऊन निघाली. मात्र ती पोहोचलीच नाही. संध्याकाळी तिचे वडील घरी आले असता आईने विचारले. तेव्हा त्‍यांनी मुलगी आलीच नसल्याचे सांगितले. सर्वांनी शेतात जाऊन तिचा शोध घेतला. मात्र ती मिळून आली नाही. नातेवाइक, मैत्रिणींकडेही विचारपूस केली. मात्र कुणालाच काही माहिती नव्हते. अखेर फुलंब्री पोलिसांत अपहरणाची तक्रार करण्यात आली. पोलिसांनी अपहरण करणाऱ्या अज्ञात व्यक्‍तीविरुद्ध गुन्हा दाखल केला आहे. मुलगी ११ वीत शिकत होती.