सिल्लोड (सीएससीएन वृत्तसेवा) : एका माथेफिरू महिलेने पालकमंत्री अब्दुल सत्तार यांना चांगलेच अडचणीत आणल्याचे दिसत आहे. वांगी बुद्रूक (ता. सिल्लोड) येथे एका विशिष्ट समुदायाच्या महिलेने ‘तुम्हाला मंत्री सत्तार यांनी दिलेल्या साड्या चालतात अन् आमच्या समाजाविषयी द्वेष का पसरवता?’ असे ग्रामस्थांना सुनावले होते. त्यानंतर वांगी बुद्रूकसह बहुलीच्या संतप्त महिलांनी सत्तारांनी वाटप केलेल्या ४०० वर साड्यांची होळी केली होती. या घटनेचे लोण हळूहळू तालुक्यात पसरत असून, मांडणा येथील ग्रामस्थांनीही सत्तार यांनी वाटप केलेल्या साड्यांची सोमवारी (८ ऑक्टोबर) होळी केल्याचा प्रकार समोर आला आहे.
ग्रामस्थांच्या सांगण्यानुसार, वांगी बुद्रूक येथील मंदिरात शनिवारी रात्री ९ वाजता शिवव्याख्याते ओम पुंगळे पाटील यांचे व्याख्यान सुरू होते. ते व्याख्यानात बांगलादेशातील परिस्थितीवर भाष्य करत असताना गावातील विशिष्ट समुदायाची एक महिला चप्पल घालून मंदिरात आली अन् मोबाइलमध्ये महाराजांच्या व्याख्यानाचे शूटिंग करू लागली. तेवढ्यावरच न थांबता तिने व्याख्यान रोखण्याचा प्रयत्नही केल्याचा आरोपही ग्रामस्थांनी केला. रविवारी सकाळी ग्रामस्थांनी त्या महिलेला रात्रीच्या प्रकाराबद्दल जाब विचारला असता ती म्हणाली, ‘तुम्हाला मंत्री सत्तार यांनी दिलेल्या साड्या चालतात, मग आमच्या समाजाविषयी द्वेष का पसरवता?’ तिचे हे वक्तव्य घराघरात पसरताच महिला संतप्त झाल्या होत्या.
वांगी बुद्रूक आणि बहुलीच्या महिलांनी सत्तारांनी वाटप केलेल्या साड्यांची होळी करून महिलेच्या वक्तव्याचा निषेध केला होता. त्यानंतर मांडणा येथील महिला, ग्रामस्थांनी एकत्र येत सत्तारांनी वाटप केलेल्या साड्यांची होळी केली. विधानसभा निवडणुकी तोंडावर अशा घटनांमुळे सत्तारांच्या अडचणीत भर पडली आहे. आधीच भाजप नेते रावसाहेब दानवे यांच्यासोबत त्यांच्या सुरू असलेल्या वादामुळे भाजप पदाधिकारी, कार्यकर्ते दुरावले असताना त्यात आता ग्रामस्थांच्या रोषाची भर पडली आहे. दोन समाजात तेढ निर्माण करणाऱ्या त्या महिलेविरुद्ध कारवाईची मागणी होऊ लागली आहे.
यासंदर्भातील वृत्त एका प्रसिद्ध दैनिकात दिले आहे.
.jpg)
