मविआ देणारी नाही घेणारी; मतांत फूट पाडणाऱ्या बेईमानांना धडा शिकवा; कन्‍नड, वैजापूरमध्ये मुख्यमंत्री एकनाथ शिंदे आक्रमक; जाहीर सभांना अलोट गर्दी

कन्‍नड /वैजापूर (सीएससीएन वृत्तसेवा) : ज्‍यांनी लाडकी बहीण योजनेला कोर्टात नेलं, तेच आज प्रत्‍येक महिलेला ३ हजार रुपयांचा हप्ता देऊ, असे म्‍हणत आहेत. पण महाविकास आघाडी देणारी नाही, घेणारी आहे. फसवी आहे. ते खोटे आश्वासन देऊन दिशाभूल करत आहेत. त्‍यांनी लाडकी बहीण योजनेत खोडा घातला. त्‍यांना आता जोडा दाखवा. कन्‍नडच्या विकासासाठी राज्‍यात पुन्हा महायुतीचे राज्‍य आणा. केंद्रात नरेंद्र मोदी यांचे सरकार आहे, त्‍यामुळे राज्‍यातही युतीचे सरकार हवे आहे. हे डबल इंजिन सरकारच राज्‍याचा आणि पर्यायाने कन्नडचा विकास घडवणारे आहे, असे प्रतिपादन मुख्यमंत्री एकनाथ शिंदे यांनी कन्‍नड आणि वैजापूरमध्ये जाहीर सभेत आज, ११ नोव्हेंबरला दुपारी केले.

कन्‍नडच्या महायुतीच्या शिंदे गटाच्‍या उमेदवार संजना जाधव आणि वैजापूरचे महायुतीचे शिंदे गटाचे उमेदवार रमेश बोरनारे यांच्या प्रचारार्थ त्‍यांनी सभा घेतल्या. भाजप नेते रावसाहेब दानवे, खासदार संदिपान भुमरे यांच्यासह तिन्ही पक्षांचे पदाधिकारी सभेला उपस्थित होते. एकनाथ शिंदे म्‍हणाले, की आम्‍ही बंड केले म्‍हणून शिवसेना वाचली अन्यथा काँग्रेसने शिवसेना, धनुष्यबाण विकला असता. त्‍यांनी बाळासाहेब ठाकरे यांचे विचार सोडले म्‍हणून आम्ही आक्रमक झालो. आता ते घरी बसले आहेत. काही लोक मराठा समाजाला सांगतात, यांना मतदान करा, काही लोक ओबीसी समाजाला सांगतात, अमक्‍याला मतदान करा. या बेईमान लोकांचे ऐकू नका, असे आवाहन करून मुख्यमंत्री शिंदे यांनी सरकारने महिला, युवक, शेतकऱ्यांसाठी राबविलेल्या योजनांची यादीच सादर केली. लाडकी बहीण योजनेच्या विरोधात मविआचे नेते कोर्टात गेले. या योजनेच्या चौकशीची मागणी करून योजना बंद पाडण्याचा प्रयत्‍न केला. आम्‍हाला जेलमध्ये टाकण्याचा प्रयत्‍न केला. पण मी आनंद दिघे यांचा चेला आहे. लाडक्‍या बहिणींच्या विरोधात गेलेल्या या लोकांना धडा शिकवल्याशिवाय राहणार नाही, असा इशाराही मुख्यमंत्र्यांनी दिला.