बिबट्याने केली १० वर्षीय चिमुकलीची शिकार!; पैठण तालुक्‍यातील ७४ जळगावमधील धक्कादायक घटना

पैठण (सीएससीएन वृत्तसेवा) : बिबट्याने केलेल्या हल्‍ल्‍यात १० वर्षीय चिमुकलीचा मृत्‍यू झाला आहे. ही घटना पैठण तालुक्‍यातील ७४ जळगाव येथे बुधवारी (१३ नोव्‍हेंबर) दुपारी चारच्या सुमारास घडली. प्रणाली भारत मुळे (वय १०, रा. ७४ जळगाव) असे या चिमुकलीचे नाव आहे. ती शेतात कापूस वेचत असताना बिबट्याने अचानक हल्‍ला चढवला.

पैठण तालुक्यातील ७४ जळगाव परिसरात बिबट्या आजवर अनेकदा आढळला आहे. बुधवारी त्‍याने थेट चिमुकलीचा फडशा पाडल्याने गावकरी हादरून गेले आहेत. विद्यार्थी, महिलांत भीतीचे वातावरण पसरले आहे. विद्यार्थ्यांच्या संरक्षणार्थ आता पालकांना शाळेत येजा करावी लागत आहे, असे सरपंच ऋतुजा अमोल एरंडे यांनी सांगितले. यापूर्वीच ग्रामपंचायतीने बिबट्याच्या बंदोबस्तासाठी तहसीलदार सारंग चव्हाण व खासदार संदीपान भुमरे यांना निवेदन दिले होते. वन विभागाने गावात येऊन बिबट्याला जेरबंद करण्यासाठी शिवारात पिंजराही लावला होता.

बुधवारी गाव शिवारातील राधाकिसन मुळे यांच्या शेतात मनीषा भरत मुळे ही महिला कापूस वेचणीसाठी गेली असता सोबत तिची मुलगी प्रणालीही होती. कापूस वेचत असताना प्रणालीवर बिबट्याने हल्ला करत तिला तुरीच्या पिकात ओढत नेले. तिच्या आक्रोशाने सोबतच्या सहा-सात महिलांनी आरडाओरड केल्याने बिबट्याने प्रणालीला जागेवरच सोडले. प्रणाली बिबट्याच्या हल्ल्यात गंभीर जखमी झाल्याने कुटुंबीयांनी बिडकीन येथील सरकारी रुग्णालयात दाखल केले. मात्र वैद्यकीय अधिकाऱ्यांनी तपासून मृत घोषित केले. बिडकीनचे सहायक पोलीस निरीक्षक नीलेश शेळके यांनी पथकासह घटनास्थळी पाहणी केली. प्रणाली सहावीत शिकत होती.