बिबट्याच्या हल्ल्यात १५ वर्षीय मुलाचा मृत्‍यू, सत्संगासाठी आश्रमात आला होता, लघुशंकेसाठी बाहेर पडला अन्‌…, कन्‍नडची थरारक घटना

कन्‍नड (कार्तिक राजगुरू : सीएससीएन वृत्तसेवा) : कन्‍नड तालुक्‍यातील भांबरवाडीजवळील आनंद महाराज यांच्या आश्रम परिसरात बिबट्याच्या १५ वर्षीय मुलाचा मृत्यू झाला आहे. ही खळबळजनक घटना मंगळवारी (२५ जून) रात्री घडली. ऋषिकेश विलास राठोड (रा. भांबरवाडी) असे मृत्‍यू झालेल्या मुलाचे नाव आहे.

ऋषिकेश आई- वडिलांसोबत गावाजवळील आनंद महाराजांच्या आश्रमात सत्संगासाठी आला होता. रात्री आठला तो लघुशंकेसाठी आश्रमाबाहेर गेल्यानंतर बराच वेळ झाला तरी परतला नसल्याने आई-वडिलांनी शोध सुरू केला. रात्रभर ग्रामस्थांनीही शोध घेतला मात्र तो मिळून आला नाही. बुधवारी सकाळी साडेसातच्या सुमारास आश्रमापासून पाचशे मीटर अंतरावरील शंभर फूट खोल दरीत रक्ताने माखलेल्या अवस्थेत तो मिळून आला. त्याच्या अंगावर बिबट्याच्या नखांचे ओरखडे होते. त्याला नातेवाइकांनी कन्नड येथील ग्रामीण रुग्णालयात दाखल केले असता वैद्यकीय अधिकारी डॉ. सुहास कुलकर्णी यांनी तपासून मृत घोषित केले.

घटनेची माहिती मिळताच कन्‍नड ग्रामीण ठाण्याचे सहायक पोलीस निरीक्षक डॉ. रामचंद्र पवार व वन विभागाच्या कर्मचाऱ्यांनी घटनास्थळी धाव घेतली. ऋषिकेशच्या पश्चात आई, वडील, एक भाऊ, दोन बहिणी असा परिवार आहे. ऋषिकेश कन्‍नड येथील साने गुरुजी विद्यालयात नववीत शिकत होता. तो अत्यंत हुशार विद्यार्थी होता. शिक्षणासाठी गावातून कन्‍नडला येजा करत होता. घरात धार्मिक वातावरण असल्याने लहानपणापासून आई- वडिलांसोबत सत्संगासाठी आश्रमात जात होता.