Update : विषबाधित विद्यार्थ्यांचा आकडा तब्‍बल २४३ वर!; पैठणच्या केकत जळगावातील घटना

पाचोड, ता. पैठण (सीएससीएन वृत्तसेवा) : केकत जळगाव (ता. पैठण) येथील जिल्हा परिषद शाळेतील २४३ विद्यार्थ्यांना शालेय पोषण आहारातून देण्यात आलेल्या बिस्किटांतून विषबाधा झाली. ही घटना शनिवारी (१७ ऑगस्ट) सकाळी नऊच्या सुमारास घडली. विद्यार्थ्यांवर पाचोड येथील ग्रामीण रुग्णालयात उपचार सुरू आहेत.

शाळेत पहिली ते सातवीपर्यंतचे वर्ग भरतात. एकूण २९६ विद्यार्थी शिकतात. सकाळी आठला परिपाठ झाल्यानंतर विद्यार्थ्यांना बिस्किटे देण्यात आली. ती खाल्ल्यानंतर काही वेळातच त्‍यांना मळमळ व उलटी होण्यास सुरुवात झाली. शिक्षकांनी पालकांना कळवल्यानंतर ग्रामस्थ आणि सरपंचांनी शाळेत धाव घेतली. विद्यार्थ्यांना उपचारासाठी पाचोड येथील ग्रामीण रुग्णालयात दाखल केले. प्रारंभी १०० विद्यार्थ्यांना दाखल केले. हा आकडा २४३ विद्यार्थ्यांपर्यंत गेला. वैद्यकीय अधीक्षक डॉ. संदीपान काळे, डॉ. नोमान शेख, डॉ. बाबासाहेब घुगे, डॉ राहुल दवणे, डॉ. अक्षय खरग, डॉ. वैष्णवी ठाकरे यांनी विद्यार्थ्यांवर उपचार सुरू केले.

वैद्यकीय अधीक्षक डॉ. काळे यांनी पाचोड येथील सर्वच खासगी दवाखान्यातील डॉक्टरांना ग्रामीण रुग्णालयात पाचारण केले. विद्यार्थ्यांनी खाल्लेल्या बिस्किटांची छत्रपती संभाजीनगर येथील प्रयोगशाळेत तपासणी करण्यात येणार असल्याचे अन्न औषध प्रशासन अधिकारी कुचेकर यांनी सांगितले. २४३ पैकी २३७ विद्यार्थ्यांना सायंकाळी सहाला सुटी देण्यात आली. उर्वरित ६ विद्यार्थ्यांवर उपचार सुरू असून त्यांची प्रकृती स्थिर असल्याचे वैद्यकीय अधिकाऱ्यांनी सांगितले.
सहायक पोलिस निरीक्षक शरदचंद्र रोडगे यांनी ग्रामीण रुग्णालयात येऊन पाहणी केली.