धारेश्वरच्या धबधब्यात तोल जाऊन तरुणाचा मृत्‍यू, सोयगाव तालुक्‍यातील दुर्घटना

सोयगाव (सीएससीएन वृत्तसेवा) : निसर्ग सौंदर्य लाभलेल्या धारेश्वर धबधब्यात पाय घसरून पडल्यामुळे २० वर्षीय तरुणाचा मृत्यू झाल्याची घटना आज, २२ जुलैला सकाळी ११ च्या सुमारास समोर आली. रविवारी सायंकाळी तो पाय घसरून कुंडात पडला होता. १७ तासांनी मृतदेह धारेश्वर धबधब्याच्या कुंडाच्या कपारीत आढळला.

गौरव किसन नेरकर (वय २०, रा. खंडेरावनगर जळगाव) असे मृत्यू झालेल्या तरुणाचे नाव आहे. जळगाव शहरातील १६ जणांचा एक ग्रुप रविवारी सायंकाळी सहाला सोयगाव तालुक्यातील धारेश्वर धबधब्याजवळ मुक्कामासाठी आला होता. रात्रभर मुक्काम करून पहाटे सकाळीच दर्शन घेऊन सोमवारी त्यांचा परतीचा प्रवास होणार होता. दरम्यान, त्यातील गौरव हा हात-पाय धुण्यासाठी जातो, असे सांगून रविवारी सायंकाळी सहाला धबधब्याजवळ गेला असता त्याचा अचानक तोल जाऊन पाय घसरला.

तो धबधब्यात जाऊन पडला. एक तास होऊनही तो परतला नसल्याने त्याच्या मित्रांनी शोध घेतला. परंतु तो आढळला नाही त्यामुळे त्यांनी रात्री आठ वाजता बनोटी पोलीस दूरक्षेत्र गाठून गौरव हरविल्याची तक्रार दिली. त्यावरून सोयगाव पोलिसांनी संशयावरून गौरवचा धबधब्यात शोध  सुरू केला. मध्यरात्री एकपर्यंत पोलिसांनी ग्रामस्थ व पोलीस पाटील सुनील जाधव यांच्या मदतीने रेस्क्यू मोहीम राबविली.

मध्यरात्री एकनंतर मोहीम थांबवून पुन्हा सोमवारी सकाळी सात वाजता सोयगावचे पोलीस उपनिरीक्षक रजाक शेख, विकास दुबिले, संदीप सुसर, सतीश बर्डे, राजू बर्डे यांनी पट्टीचे पोहणारे रामदास जाधव यांच्या मदतीने पोलीस पाटील सुनिल जाधव, श्रीरंग जंजाळ, बंडू पाटील, सोन्या गवळी आदींनी बचाव कार्य हाती घेतले. अखेर सकाळी अकरा वाजता रामदास जाधव यांना धबधब्याच्या खोल कपारीत गौरवचा मृतदेह आढळला. बनोटी प्राथमिक आरोग्य केंद्रात डॉ. कादरी सपुरा यांनी शवविच्छेदन केले. मृतदेह नातेवाईकांच्या ताब्यात दिला.

दरवर्षी मृत्यू, उपाययोजना नाहीच…
धारेश्वर धबधब्यात दरवर्षी तीन ते चार जणांचा बुडून मृत्यू होतो. तालुका प्रशासनाने अद्यापही या धोकादायक पर्यटन स्थळावर सुरक्षिततेच्या दृष्टीने कोणत्याही उपाययोजना केलेल्या नाहीत. या ठिकाणी संरक्षण भिंत उभारणे गरजेचे आहे, असे स्थानिकांचे मत आहे. या प्रकरणी पोलीस निरीक्षक पंकज बारवाल, उपनिरीक्षक रज्जक शेख, विकास दुबिले, संदीप सुसर, राजू बर्डे तपास करत आहेत.