आईचा मृतदेह विहिरीत तरंगताना पाहून मुलीनेही घेतली उडी!; मायलेकीच्या आत्‍महत्‍येने खुलताबाद तालुक्‍यात खळबळ

खुलताबाद (सीएससीएन वृत्तसेवा) : आईने विहिरीत उडी घेऊन आत्महत्या केल्याचे पाहताच १७ वर्षीय मुलीनेही विहिरीत उडी घेतली. ही धक्कादायक घटना खुलताबाद तालुक्यातील गल्लेबोरगाव येथील दुधारे वस्तीवर गुरुवारी (५ सप्‍टेंबर) सकाळी सातला समोर आली. वंदना भरत दुधारे (वय ३५ वर्षे) व पल्लवी भरत दुधारे (वय १७ वर्षे) असे आत्‍महत्‍या केलेल्या मायलेकीची नावे आहेत.

शेतकरी भरत भिकन दुधारे यांची गल्लेबोरगाव आखातवाडा रोडवरील दुधारे वस्तीवर शेती असून, शेतातच ते पत्नी वंदना, मुलगा दीपक (वय १५), मुलगी पल्लवीसह राहत होते. बुधवारी रात्री घरातील सर्व कामे करून वंदना व पल्लवी यांनी हातावर मेहंदी काढली. वंदना यांनी एका हातावर पती भरत व दुसऱ्या हातावर मुलगा दीपकचे नाव काढले. त्यानंतर दोघी रात्री झोपी गेल्या. सकाळी उठल्यावर पल्लवीला आई घरात दिसली नाही.

शेतात शोधल्यानंतर घरापासून काही अंतरावरील विहिरीत डोकावले असता तिला आईचा मृतदेह तरंगताना दिसला. पल्लवीने कोणताही विचार न करता विहिरीत उडी घेतली. भरत दुधारे सकाळी सातच्या सुमारास झोपेतून उठले असता त्यांना घरात पत्नी, मुलगी दिसली नाही. आजूबाजूला चौकशी केली असता शेजाऱ्यांनी मुलगी विहिरीकडे गेल्याचे सांगताच त्यांनी तातडीने विहिरीकडे धाव घेतली. वंदनाचा मृतदेह तरंगताना दिसला; पण मुलगी दिसली नाही. ग्रामस्थांच्या मदतीने वंदना दुधारे यांचा मृतदेह काढून पल्लवीचा शोध घेतला असता तिचा विहिरीच्या तळाला पल्लवीचाही मृतदेह आढळला.

दोन्ही मृतदेहांची वेरूळ येथील प्राथमिक आरोग्य केंद्रात उत्तरीय तपासणी करण्यात येऊन दुपारी तीनला दुधारे वस्तीवर अंत्यसंस्कार करण्यात आले. खुलताबाद पोलिसांनी आकस्मिक मृत्यूची नोंद करून तपास सुरू केला आहे. वंदना दुधारे यांचे माहेर गंगापूर तालुक्यातील वरखेड आहे. त्यांना वाल्मीक जानराव हा एकुलता एक भाऊ असून, आई- वडिलांचे निधन झाले आहे. बहीण आणि भाचीच्या मृत्‍यूची वार्ता कळताच जानराव तातडीने गल्लेबोरगावकडे निघाले. पत्नीसह दुचाकीने येत असताना गुरुवारी सकाळी नऊच्या सुमारास सिद्धनाथ वाडगाव येथे समोर कुत्रा आल्याने दुचाकी घसरून हे दाम्पत्य पडले. प्रथमोपचार घेतल्यानंतर ते अंत्यविधीसाठी गल्लेबोरगाव येथे आले.