सिल्लोड/ खुलताबाद (सीएससीएन वृत्तसेवा) : छत्रपती संभाजीनगर जिल्ह्यात दोन तरुणांसह एका महिलेला दुर्दैवी जलसमाधी मिळाली, तर एका तरुणाने मराठा आरक्षणासाठी जलसमाधी घेतली. या घटना रविवारी (१३ ऑक्टोबर) सिल्लोड, खुलताबाद आणि वैजापूर तालुक्यात समोर आल्या आहेत.
-निल्लोड (ता. सिल्लोड) येथील निवृत्ती लक्ष्मण आहेर (वय २१) हा छत्रपती संभाजीनगर येथे स्पर्धा परीक्षेची तयारी करत होता. शनिवारी दसऱ्यानिमित्त तो गावी आला. रविवारी सकाळी दहाला प्रातः विधीसाठी घराबाहेर गेला होता. दुपारपर्यंत घरी न आल्याने कुटुंबीयांनी शोध सुरू केला. शेतातील विहिरीजवळ त्याची चप्पल आणि डब्बा दिसला. तो विहिरीत पडला असावा, असे समजून छत्रपती संभाजीनगर महापालिकेच्या अग्निशमन विभागाच्या कर्मचाऱ्यांना पाचारण करण्यात आले. विहिरीत पाणी जास्त असल्याने उपसा करण्यात आला. त्यानंतर गळाच्या साह्याने दुपारी अडीचच्या सुमारास त्याचा मृतदेह विहिरीबाहेर काढण्यात आला. निवृत्तीच्या पश्चात आई, वडील, १ भाऊ, २ बहिणी असा परिवार आहे. या घटनेची नोंद वडोद बाजार पोलिसांनी घेतली आहे.
-सिरसाळा तांडा (ता. सिल्लोड) येथील सगुनाबाई महिपत पवार (वय ४२) या रविवारी सकाळी अकराला कपडे धुण्यासाठी गावाशेजारील तलावावर गेल्या होत्या. त्यांचा पाय घसरून पाण्यात पडल्याने बुडू त्यांचा मृत्यू झाला. या घटनेची अजिंठा पोलिस ठाण्यात नोंद करण्यात आली आहे.
-बाजारसावंगी (ता. खुलताबाद) येथील गौरव मनोज जाधव (वय १७) हा वाळूज परिसरातील तंत्रनिकेतन महाविद्यालयात शिक्षण घेत होता. दसऱ्यासाठी दोन दिवसांकरिता गावी आला होता. रविवारी दुपारी दोनच्या सुमारास चार ते पाच मित्रांसह तो शेखपूरवाडी शिवारातील महादू काटकर यांच्या विहिरीत पोहण्यासाठी गेला. गौरवला पोहता येत नसतानाही पोहण्याचा मोह झाला. त्याने विहिरीत उडी मारली. तो वर आलाच नाही. मित्रांनी आरडाओरडा केल्याने ग्रामस्थांनी धाव घेतली. पोहण्यात तरबेज असलेल्यांनी विहिरीत शोध घेतला. मात्र तो सापडला नाही. सायंकाळी छत्रपती संभाजीनगर मनपाच्या अग्निशामक दलाला पाचारण करण्यात आले. अग्निशामक दलाच्या जवानांनी सायंकाळी पाचच्या सुमारास गौरवला बाहेर काढले. बाजारसावंगीच्या प्राथमिक आरोग्य केंद्रात नेले असता डॉ. निलोफर अंजुम यांनी त्याला तपासून मृत घोषित केले. शवविच्छेदनानंतर मृतदेह नातेवाईकांच्या ताब्यात देण्यात आला.
-मराठा आरक्षणासाठी महेश रखमाजी इंगळे (वय २५) याने विहिरीत उडी घेऊन जलसमाधी घेतली. ही घटना वैजापूरनजीक इंगळे वस्ती येथे रविवारी दुपारी चारला समाेर आली. महेश शनिवारी रात्रीपासून बेपत्ता होता. स्वतःच्या शेतातील विहिरीत त्याचा मृतदेह आढळला. वैजापूर येथील उपजिल्हा रुग्णालयात शवविच्छेदन करण्यात आले. सायंकाळी सहाच्या सुमारास महेशच्या पार्थिवावर इंगळे वस्तीवर अंत्यसंस्कार करण्यात आले. आत्महत्येपूर्वी महेशने मराठा आरक्षणासाठी आत्महत्या करीत असल्याची चिठ्ठी लिहून ठेवली होती. महेश अविवाहित होता. नोकरी मिळत नसल्याने एका व्यापाऱ्याकडे काम करत होता. त्याच्या पश्चात आई, वडील, भाऊ असा परिवार आहे.
