तहसीलदारांची खुर्ची जाळणाऱ्या सरपंच साबळेंना अटक, हर्सूल कारागृहात रवानगी, अखंड मराठा समाजानेही फटकारले, साबळे समाज अन्‌ आरक्षणविरोधी!

फुलंब्री (सीएससीएन वृत्तसेवा) : फुलंब्री तहसील कार्यालयातील तहसीलदारांची खुर्ची कार्यालयाबाहेर आणून पेटवून देणाऱ्या गेवराई पायगाच्या सरपंच मंगेश साबळे यांच्यासह तिघांना फुलंब्री पोलिसांनी मंगळवारी (२४ सप्टेंबर) दुपारी साडेबाराला दरीफाटा येथून अटक केली. गुन्हा दाखल करून त्‍यांना न्यायालयात हजर केले असता तिघांचीही न्यायालयाने हर्सूल कारागृहात रवानगी केली आहे.

मंगेश साबळे, अजिनाथ नारायण साबळे (रा. गेवराई पायगा), वसंत शामराव बनसोड (रा. पाथ्री) अशी अटक केलेल्यांची नावे आहेत. तिघे मंगळवारी सकाळी अकराच्या सुमारास तहसील कार्यालयात आले. तहसीलदारांच्या दालनात कोणीही नसल्याची संधी साधून त्यांनी तहसीलदारांची खुर्ची इमारतीबाहेर आणली. सोबत आणलेल्या कॅनमधील पेट्रोल टाकून खुर्ची पेटवून दिली. नंतर त्यांनी एक मराठा, लाख मराठा अशी घोषणाबाजी केली. महसूल सहायक दिलीपसिंग पवार यांनी दिलेल्या तक्रारीवरून फुलंब्री पोलिसांनी तिघांविरुद्ध गुन्हा दाखल केला आहे. मंगेश साबळे यांनी आपल्या कृत्‍याचे समर्थन केले असून, सरकारचे लक्ष वेधण्यासाठी खुर्ची पेटवून दिल्याचे म्‍हटले आहे.

अखंड मराठा समाजाने मंगेश साबळेंचा केला निषेध…
दरम्यान, अखंड मराठा समाजाने सायंकाळी पोलिसांना पत्र देत मंगेश साबळे व वसंत बनसोड यांचा अखंड मराठा समाजाशी कुठल्याही प्रकारचा संबंध नसून, या घटनेचा आम्ही जाहीर निषेध करतो, असे म्हटले आहे. पत्रात म्हटले आहे, की अंतरवाली सराटी येथे मनोज जरांगे पाटील यांचे शांततेच्या मार्गाने बेमुदत उपोषण सुरू आहे. त्यांनी सर्व मराठा समाज सेवकांना शांततेत आंदोलन करण्याचा आदेश दिला आहे. जो कोणी जाळपोळ, शासकीय कार्यालयांची नासधूस करेल, तो आमच्या मराठा समाजाचा, आरक्षणाच्या विरोधी असेल असे स्पष्ट आदेश दिल्याचेही पत्रात म्‍हटले आहे.